ELMAR ta informa situacion di dialuna anochi:
ORANJESTAD (AN): ELMAR a indica cu dialuna anochi, a enfrenta un situacion inespera den un parti di e area di Paradera y Santa Cruz. Den un esfuerso pa mantene transparencia y comunicacion abierto cu e clientenan, ta duna un relato riba e esfuerzonan cu a haci pa soluciona e situacion.
Pa mas o menos 7:21 PM, nan sistema di comunicacion di grid a notifica cu tin un interupcion den e distribucion di coriente den e areanan di Seroe Biento, Piedra Plat, Pavia, Meiveld, Cumana y vecindario.
E ekipo tecnico a mobilisa inmediatamente pa atende e situacion aki. Durante esaki, otro team tecnico tabata ocupa cu finalisacion di trabounan di reparacion na Noord, cu a ser afecta pa un accidente di auto envolviendo un poste di coriente. Na momento cu e team aki a termina e trabou na Noord, nan a bay reenforsa e otro team cu tabata na e sitio.
Pa mas o menos 7:49 PM, e tecniconan tabata na e sitio pa identifica y aborda e problema cu a causa e interupcion di servicio di coriente. Nan a duna nan maximo esfuerso pa por identifica e fuente di e problema y a traha duro pa soluciona esaki lo mas pronto posibel.
A surgi un corto circuito den e red di alto tension. Na momento cu e tecniconan a identifica esaki por a cuminsa suministra coriente bek.
Durante cu a cuminsa duna coriente, a surgi un problema cu un switch di alto tension, esaki a wordo coregi inmediatamente.
Pa mas o menos 9:25 PM, a logra restablece e suministro di coriente den mayoria di e area afecta. Nos tecniconan no a para niun momento pa sigura cu por restablece e servicio cu nos ta brinda.
Pa mas o menos 9:39 PM, a restablece e suministro di coriente na Seroe Pita. Finalmente, na 10:10 PM, a logra completa e tarea pa restablece e suministro di coriente den tur area afecta.
Nan ekipo ta dedica pa sigura seguridad y confiabilidad di e infrastructura electrico den tur area. Nos ta compronde e importancia di un bon servicio di coriente den bida diario. Nos ta aprecia e pasenshi durante e momento dificil aki. Nos ta keda comprometi pa sigui brinda e miho servicio posibel, y nos ta gradici tur habitante pa e confiansa continuo.
