PHILIPSBURG: E trabaonan pa cu renobacion y expansion di Aeropuerto Internacional Prinses Juliana na isla di St. Maarten ta bayendo bon.
E siman aki, e compania operador PJIAE a suministra e potretnan aki como update di e proyecto, cual a cuminza traha riba dje na September 2021.
E compania a splica cu e trabaonan awor ta den su etapanan final. E sala nobo di Salida ta hayando su forma final tambe caba, y su interior impresionante ta birando visible. E elementonan arkitectonico cu antes tabata visible djis riba e mapa, awor ta ser mira como un ambiente di Aeropuerto moderno. E etapa recien cu nan a logra cune ta e piso terrazzo cu ta casi cla. E ta duna e sala di Departures aki un imagen moderno y sofistica.
Ademas di e piso terrazzo aki, e Aeropuerto a instala liftnan nobo, cu a wordo integra na forma util den e terminal pa optimaliza e fluho di pasahero.
Entrante October, pasaheronan cu yega St. Maarten lo wordo pasa den un Facilidad Temporal di yegada cu a caba di wordo traha, cu tur amenidad y servicio, incluyendo boothnan di Inmigracion y Aduana. E facilidad temporal aki lo bay evita cu lo haya dolor di cabez pa cu e finalisamento di e proyecto.
E terminal mes reconstrui lo wordo habri segun fase. E Departure Hall mes cu e tiendanan nobo den Aeropuerto lo bay habri dia 1 November 2023. Despues lo sigui finaliza e sala di check-in, cu lo habri na December 2023.
