Sero gigantesco di tire di auto acumulando riba e dump na Parkietenbos

ORANJESTAD (AAN): Atrobe tin un sero gigantesco di tire di auto acumulando riba e dump na Parkietenbos.

Segun Anouk Balentina, ora esaki pega candela nan ta produci un nubia scur di huma  toxico, enorme cu ta visible desde gran parti di e isla. Y si e biento mester cambia, manera e temporada aki ta sosode frecuentemente, e huma lo penetra den ful e bario y hasta mas leu, incluyendo riba nos areopuerto internacional Reina Beatrix. E kimamento di tire, manera demostra anteriormente, no por wordo paga y e huma toxico ta permanece pa varios dianan te ora e candela paga di su mes.

Si a caso kier bolbe insinua cu e stapel nobo di tire no ta wordo cendi deliberadamente,  hecho ta cu e ta mas cu sigur cu e lo pega candela.

Na final y al cabo ta publicamente conoci cu regularmente e dump ta cende na candela espontaneamente. Logicamente, esnan cu ta pone e tirenan na e sitio ta preparando deliberadamente, a proposito un proximo desaster ambiental.

E ausencia di control, supervicion y implementacion di regulacion y leynan di parti di gobierno automaticamente ta promove mas delito medioambiental, cu tin efectonan adverso pa nos comunidad, salubridad publico y nos turismo.

Apesar di tur e bunita palabranan cu gobierno ta hibando e ultimo dianan regardando sostenibilidad y hasta ta ser bisa cu lo uni  na e lucha mundial contra e cambio climatico combatiendo e contaminacion atmosferica, señora Balentina ta  señala, lastimamente, cu tur esaki ta un simpel “greenwash” y nos ta na caminda pa mas desaster medioambiental.

Cu e prediccion aki, na momento cu e tirenan aki cende na candela, no por bisa mas, manera semper ta e caso: “nos no por a preveni esaki”.

Señora Balentina ta kere cu si tin solucion, manera Serlimar, cu ta esun encarga cu e maneho di desperdicio y e tereno di e landfill Parkietenbos na prome lugar por duna instruccion pa ubica e tirenan aki na otro sitio. Si no tin alternativa, Serlimar lo por isola e tirenan riba e tereno mes. Pa esaki Serlimar mester hasi uso di un bulldozer y santo cual DOW tin den su poder y por facilita na Serlimar. DOW ta hasi uso di e tereno cu ta bou maneho di Serlimar gratuitamente pa opera un incinerator, pues nan por intercambia servico y asina traha proactivo den lugar di reactivo, ora ya ta laat.

"Sperando cu mi pronostico no bira realidad, ja cu e ultimo cos cu ami ta desea como habitante di e area, ta pa permanece atrobe bou di un nubia di huma toxico pa varios dia. Pero si esaki sosode, mi no lo duda den denuncia esnan responsabel pa e crimen premedita y delibera di intento di asesinato mediante un desastre medioambiental. Tur a wordo adverti" señora Anouk Balentina a enfatiza.