ORANJESTAD (AAN): Como parti di e lansamento oficial di "Dia Nacional pa Cuida Aruba", Serlimar y CEDE Aruba a confirma nan compromiso cu
e iniciativa y a haci un apelacion na comunidad pa participa activamente den e gran accion nacional di limpiesa cu lo tuma luga riba diasabra 25 di juli. Durante e rueda di prensa na Dam di Moko, Director di Serlimar Michel Henriquez a indica cu, aunke Serlimar ta dedica gran parti di su trabou diario na mantene Aruba limpi, e reto no por wordo logra door di un solo instancia. Henriquez a explica cu Serlimar ta traha tur dia pa piki sushi y mantene e diferente area di Aruba, pero cu e resultado cu comunidad kier mira ta pidi participacion di tur ciudadano.
"E dia 25 di juli ta un oportunidad importante pa nos tur traha hunto. Si Gobierno, instancianan y comunidad uni forsa, nos por logra un gran resultado y duna un impulso nobo na cuido di nos isla." E Director di Serlimar a expresa su gratitud na Gobierno pa involucra e empresa den e iniciativa, resaltando cu solamente door di colaboracion entre tur sectornan lo ta posibel pa logra un cambio duradero.
Director di CEDE Aruba, Daniel Tecklenborg, tambe a enfatisa cu cuido di Aruba ta un responsabilidad comparti entre ciudadano, famia, organisacionnan, empresa y comunidad. Segun Tecklenborg, CEDE Aruba, como un organisacion cu ta traha estrechamente cu diferente fundacionnan, ONG's y grupo comunitario, a ricibi cu hopi entusiasmo e invitacion pa forma parti di e movimiento nacional. "E limpiesa di nos pais ta responsabilidad di nos tur. Cada famia, cada ciudadano, cada bisiña, cada organisacion y tambe sector priva por aporta nan parti."
Pa facilita participacion, CEDE Aruba lo uza su plataforma digital ArubaVolunteers.org, unda personanan, grupo di bario, empresa, fundacionnan y voluntarionan por inscribi pa participa den e diferente accionnan di limpiesa cu lo wordo organisa rond Aruba. Den colaboracion cu Bureau City Inspector, lo identifica diferente sitio cu ta necesita mas atencion, pa e boluntarionan por traha den e area cu tin mas necesidad di limpiesa.
CEDE Aruba ta haci un invitacion na tur comunidad pa mira con cada persona por aporta, ya sea den nan propio bario, rond di cas, den un club, empresa of organisacion.
Cu e colaboracion entre Gobierno, Serlimar, CEDE Aruba, instancia publico y sector priva, "Dia Nacional pa Cuida Aruba" ta busca crea un movemento nacional di responsabilidad comparti, estimulando henter comunidad pa contribui na un Aruba mas limpi, mas bunita y mas agradabel pa biba y pa bishita.
