Dia 2 di Februari 2022 Huez mester a dicidi riba tempo di gracia --- *Pueblo lo por paga debe di Miyones y Miyones pa Serlimar continua?
ORANJESTAD (AAN)- Februari a habri como luna durante cual cierto asuntonan mester haya un contesta, cu ta den man di Corte di Husticia.
Uno di nan sigur ta Serlimar, e compania di Gobierno pa cual decision legal mester a wordo tuma.
Dia 2 di Februari 2022 mester a bira conoci si lo a prolonga e “surseance van betaling”, e tempo di gracia pa haya un solucion pa e compania of tuma decision kico ta bay socede.
Ministro Ursell Arends cu razon a admiti cu el a hereda un situacion sumamente dificil pa Aruba, cu mester bay dicidi kico ta pasa cu e empresa cu mester percura pa uno di e necesidadnan mas importante di Aruba, cu ta mantencion di su medio ambiente.
Manera na varios occasion DIARIO a trece dilanti, ta increibel cu tanto placa a wordo gasta na fiestpad y tram y no a wordo hinca den Serlimar, cu ta completamente for di tempo riba tur tereno.
E bom cu a keda tanto tempo bou e empresa di Pueblo di Aruba a rementa y dia 2 di Februari 2022 mester tabata tin un decision si e compania ta wordo declara bancarota of si e ta sigui existi.
Tin un suma basta grandi aki cu Aruba no por tuma riba su mes. Un suma mara na un debe, cu nunca mester a wordo crea.
Ta increibel cu un compania manera Serlimar a wordo permiti pa crea un debe di 17 Miyon na Gobierno y 6 Miyon na empresanan priva.
Na momento cu e problemanan serio a bini dilanti, oposicion dirigi pa Mike Eman a trece dilanti cu Aruba mester encarga su mes cu e debe di Serlimar. Un posicion politico sin duda.
E hecho cu Aruba mester baha salario di su trahadornan ta papia un palabra cla pa e situacion cu Aruba a hereda di mal gobernacion di pasado.
Den e siman venidero DIARIO ta keda en espera di e loke lo pasa cu Serlimar, cu for di 2017 mester a conoce un solucion.
Nos no kier pensa mes cu un situacion pa e compania wordo declara bancarota of mester wordo bende pa poco placa, por a wordo crea concientemente pa gobernantenan di pasado, aunke resultado financiero di Serlimar ta duna tur cos pa pensa.
Realidad ta cu decisionnan mester wordo tuma,
DIARIO ta sigui insisti cu semper tabata tin solucion pa Serlimar cu a wordo neglisha ora Gobierno Mike Eman a hinca 1.6 Biyon den infrastructura y a lubida e problema serio di Serlimar como parti esencial di infrastructura di Aruba.
DIARIO a mustra cu prueba cu e opcion pa bende pa scapa un problema, no ta esun mas practico y cu Aruba tin expertonan riba e tema aki cu ta negocia actualmente pa e proyecto grandi di Quanten cu Aruba.
En espera di decision di Huez si ta prolonga e tempo di gracia di Serlimar, DIARIO hunto cu trahadornan, companianan cu mester ricibi nan pago y Aruba cu ta e entidad legal responsabel, ta keda pendiente.
