Magaly Brito riba asunto di Arubus:
ORANJESTAD (AAN): Ademas di problemanan di trahadonan, Arubus NV tin mas retonan entre otro reclamo riba e busnan cu fayo, cu ta reclamonan cu e trahadonan tambe tin. No solamente materialnan di trabou mester ta ‘on top’ pa e trahado funciona debidamente pero tambe mester tene cuenta cu salud y bienestar di e trahado.
Señora Magaly Brito di SEPPA a remarca cu Arubus aworaki ta generando mas door cu usuarionan ta haci mas uzo di servicio di Arubus pero no suficiente pa cubri e debe grandi cu nan a acumula durante hopi aña. El a menciona cu no mester perde for di bista, cu mientras cu e situacion aki ta andando, unda trahadonan tin reclamo entre otro, bo ta haya tambe cu a yega na acuerdonan di golden handshake cu directornan. Tur e placanan ey a sali for di Arubus y no a bin bek den caha di Arubus.
Ta berdad cu e infrastructura ta trece hopi reto. Actualmente tin un persona cu ta maneha y yuda di tene e compania cabes riba awa. Di otro banda ta comprendibel cu pa motibo di e debenan grandi di e compania, no ta facil pa haya un director, pasobra na momento cu un persona asumi e puesto, e ta bira e persona responsabel pa e debenan cu tin.
Brito a remarca cu e Raad tambe mester ta responsabel pa ehecuta plannan y hiba control entre otro. El a menciona cu anteriormente, SEPPA a manda un carta pa Raad cu e pregunta kico ta e intencion y pensamentonan y pa confirma riba e negociacionnan di e contracto colectivo, y tambe confirma si ta pidiendo gobierno fondonan pa drecha e situacion y resolve e problema di trahadonan.
Raad su contesta tabata cu nan tarea ta solamente controla gerencia. Esaki, segun señora Brito ta considera, ta un wega di ping pong na unda un ta tira culpa y responsabilidad riba otro, esta gerencia, raad y e minister. “Tur ta hunga sinta hunga wega cu un tema asina importante cu ta transporte publico”, señora Brito a remarca.
El a duna di conoce cu SEPPA lo continua cu e siguiente paso y a pidi gerencia pa bay mesa di negociacion y tene cuenta cu mientras nan ta tarda, e contracto colectivo aki tin cu drenta na vigor pronto. Segun señora Brito, SEPPA ta conoci cu e weganan aki y na e momento aki SEPPA ta pushando pa un solucion di tanto e contracto colectivo y e fondonan cu SEPPA ta exigi pa Gobierno pone.
