ORANJESTAD (AAN)-- Den entrevista cu Darren van Ommeren, Presidente di SMAC, el a bisa na Matutino DIARIO, cu e carnaval a cana suave e aña aki.
“Tur cos tabata in place, bo por bisa, y di ora cu el a cuminza bo ta sintie tambe. El a cana hopi mas suave cu e añanan prome, y mi a kere esey ta e caminda cu nos a tuma durante añanan di prepara for di trempan. Nos a coy un forma di traha di henter aña den carnaval, y aunke nos NV e aña aki tabata un poco laat, door di e preparacionnan cu nos a haci for di cuminzamento di aña, tur cos a cana bon, y na e momentonan aki nos tabata tin actividadnan y paradanan hopi bon bishita, y bon producto presenta riba caminda”, van Ommeren a señala.
El a agrega cu tambe e comunicacion a bay hopi bon. Di fiho, tur Diaranzon SMAC tin reunion cu stakeholders, unda cu nan ta preparando tur cos pa e temporada. “Nos tabata tin reunion cu e gruponan, varios reunion cu e musiconan durante e aña, locual a haci tambe cu tur cos a cana suave, y tur resultado tambe tabata aceptabel”, van Ommeren a remarca.
El a bisa tambe cu, cu excepcion di algun parada, e comportacion di e publico tabata diferente, pero den e mayoria e comportacion tabata hopi bon, y esey tambe ta haci cu e paradanan a cana mas “smooth”. Gruponan cu a yega alinea tambe a logra cu tur cos a cana trankil durante e parada.
“Y ami ta pidi, den e caso aki, pa nan sigui comporta den e fin di siman aki, pa nos tin un tremendo final di Carnaval 72, exitoso”, Darren van Ommeren, presidente di SMAC a remarca.
