Señora Yuyu Croes a bira president nobo di Forza Femenino Grace

ORANJESTAD (AAN): Diabierna anochi, durante un reunion na Cede di MEP, señora Yuyu Croes a traspasa e presidencia di Forsa Femenino Grace pa señora Fabiola Maduro.

Forsa Femenino Grace ta e forsa femenino di partido MEP. E organizacion ta un sosten enorme pa partido y especialmente pa candidatonan femenino y lo enfoca riba aumenta conscientisacion riba asuntonan di hende muhe y con por empodera hende muhenan mas.

   Partido MEP ta un partido cu desde su fundacion ta crea oportunidad pa hende muhe desaroya den politica. Esaki a haci posibel cu partido MEP a bira e prome partido grandi na Aruba cu un lider politico femenino.

   E organizacion ta carga e nomber di señora Grace Bareño, den feliz memoria. Grace a nace na Aruba dia 22 di maart 1945. Na un edad hoben, na aña 1975, el a drenta arena politico y tabata e prome dama cu a aparece riba lista di nos partido. El a sigui participa na tur eleccion te cu 1989.

   Asina Grace a bira e prome dama na Aruba cu a asumi e encargo di diputado di Teritorio Insular di Aruba. Durante su trayectoria como gobernante, Grace a dedica gran parti di su trabao den e area social y a percura specialmente pa esnan cu limitacion den comunidad.

   “Mi ta gradici señora Yuyu Croes cu a lidera e organizacion aki den ultimo añanan y pa tur e sosten. Y mi ta desea señora Fabiola Maduro hopi exito!”, Lider di MEP, señora Evelyn Wever-Croes a expresa.