Señor Jose di 85 aña yudando Pius X School cu nan hardin di fruta

Como mucha el a lanta den cunucu di su tata

ORANJESTAD (AAN): Manera ta conoci, Aña Escolar cu a pasa un pida tereno na Pius X School na Dakota a wordo converti den un hardin di fruta, danki na e proyecto di Agroforesteria pa scolnan riba e isla.

   Tempo cu a haci esaki, hasta un pareha turista cu a tende di e proyecto, a yega pa asina duna un man.  Mas cu claro, e trabao di keda muha e matanan y tambe snoei y chapi cualkier yerba, ta cay mucho pisa pa docente- y alumnonan.

   Boluntario experto: Pero awor Pius X School a ricibi un boluntario, cu a bin cu su amplio conocemento di hardin pa duna un man.  Ta trata aki di señor Jose, un ciudadano di bario cu tin 85 aña di edad.

   El a bisa cu e la lanta den cunucu hunto cu su tata, plantando maishi, boonchi, comcomber, milon, y sa di tur e rekesito con bo ta planta nan, con pa laga espacio mey-mey pa bo por cana.

   Docente Gianella Gabriela a indica cu e ta hopi agradecido cu señor Jose for di propio boluntad a bin yuda muha e matanan.  Jose a splica, cu traha den hardin ta un trabao di amor y pasenshi, y bo mester tin bon curazon.  Ora di muha mata, percura pa e awa keda muha tur ora, y di e forma ey e matanan ta keda berde-berde.

    Ademas, tin biaha bo tin di canta tambe pa e matanan keda contento y crece mas rapido.  Un palabra di danki sigur na señor Jose pa e trabao boluntario aki.

   Tin varios scol na Aruba cu tin hardin, y cu mester di boluntario pa duna un man.  St. Paulus School na San Nicolas tambe ta uno cu ta buscando boluntario pa yuda.