Seminario di Grant Thornton Aruba a presenta hopi informacion relevante riba tereno fiscal  

ORANJESTAD (AAN): Recientemente a tuma lugar e seminario ‘Are you ready for 2022?’ den cual Grant Thornton Aruba a elabora riba e ultimo desaroyonan riba e terenonan di e reforma fiscal y introduccion di BTW,

Ley di Anti Money Laundering y Combating Financing of Terrorism Compliance (AML/CFT), Cyber Security y Human Capital. Un publico grandi tabata presente e atardi aki na Hyatt Place Airport Aruba unda cu diferente oradador a bin na palabra.

            Segun Lance Henriquez, Tax manager na Grant Thornton Aruba, e cambionan den ley ariba tereno di BTW cu lo mester tuma lugar na 2023 lo mester hacie mas facil pa un hende cumpli cu su obligacionnan di impuesto y na mes momento e cambionan den ley lo mester hacie mas facil tambe pa Departamento di Impuesto eherce nan funcion di control.

            Pa companianan por draai satisfactoriamente, empleadonan ta hunga un papel crucial y riba e punto aki Shelby Maduro, Senior Manager Advisory, a profundisa riba con companianan por atrae y mantene empleadonan nobo den nan organisacion. Tin diferente habilidad importante pa tene cuenta cu nan y Grant Thornton Aruba su approach ta pa haci e proceso aki mas practico. Organisacionnan mester enfoca mas riba conoce e habilidadnan cu nan kier den nan empleadonan y wak si esakinan ya ta presente den e compania prome cu busca un empleado nobo.

            Pa loke ta aspectonan cu ta regarda tecnologia, Cyber Security ta un punto primordial awendia den cualkier compania. Nigel Peterson y JR Morales kende ta esnan encarga cu e departamento di IT na Grant Thronton Aruba, a trece dilanti cu hopi cos por bai robes si e parti di IT y Cyber Security no ta bon regla den un compania y nan a duna ehempelnan di situacionnan cu a bai completamente robes den companianan grandi den otro paisnan. Cyber Security ta importante pa tur compania sea cu nan ta grandi of chikito.

            E panel na final di e seminario a wordo modera pa Edsel Lopez, Managing Partner di Grant Thornton Aruba y aki a discuti diferente topico cu representantenan di Banco Central di Aruba y Camara di Comercio y Industria unda nan a splica mas amplio riba e leynan di AML/CFT.

            Segun e Director Ehecutivo di Banco Central Prakash Mungra, cada bes mas hende ta sinti e necesidad pa haya guia riba e ley di AML/CFT. Banco Central su meta no ta pa parti multa sino mas bien pa Aruba cumpli cu e standardnan internacional. Omar Tromp, Presidente di Camara di Comercio y Industria, a mustra cu e cambionan den ley ta necesario ya cu si no haci esaki, Aruba lo perde e oportunidad pa haci comercio cu resto di mundo.

            Por ultimo, Licenne Boekhoudt kende ta Consultant y Compliance Officer na Grant Thornton Aruba a mustra cu ta importante pa cumpli cu e ley di AML/CFT. Hopi bes comerciantenan ta preocupa cu e gastonan cu e implementacion y cumplimento di ley ta rekeri pero no ta realisa cu e gastonan mara na incumplimento di ley ta hopi mas halto cu si a simplemente cumpli cu loke ta rekeri.

            Multanan ta cuminsa na alrededor di 50mil florin y por bai core te den miyones di florin. E seminario a conta cu un bon acohida y pa Grant Thornton Aruba ta un placer pa contribui pa sigui stimula e conocemento den e area financiero.