Sector Primario ta hopi importante ora ta papia di 'seguridad di cuminda'

Santa Rosa -  *Proyecto "Awa pa Agricola" ta sigui duna su frutonan

ORANJESTAD (AAN): Den transcurso di añanan ta hopi esfuerso a wordo hasi pa por yega na un acuerdo cu WEB Aruba NV pa por haya awa pa Sector Primario. Tabata esfuersonan cu tabata mustra casi imposibel cu hopi conseho y deliberacion pa por a logra yega na un bon acuerdo y entendimento.

            Sector Primario ta keda un sector hopi importante aki na Aruba ora bo kier papia di Seguridad di Cuminda. Importante tambe ta pa por logra tur esakinan pa Sector Primario mester di awa. Awa ta keda e parti hopi esencial pa por yega na metanan concretisa. Sin Awa no tin bida. Metanan cu bo por tin productonan local pa abastece e demanda. Sin awa esaki hamas por ta posibel. Mester duna credito na Gobierno di Aruba e tempo ey pa hasi esfuerso di su banda pa asina logra tambe “Awa pa Agricola”.

            Despues cu esaki a wordo concretisa y realisa di parti Gobierno di Aruba Departamento di Agricultura, cria y Pesca y WEB Aruba NV a yega e momento pa hasi e prome entrega di e meter di awa basa riba un tarifa ahusta special pa Sector Primario. E suma aki ta di AWG 5.50 fiho pa uzo di e awa aki. Pa hasi e entrega di e meternan di awa na e tarifa special aki Santa Rosa hunto cu WEB Aruba NV tin rekisitonan pa e productornan local mester cumpli cune pa yega na remarke. Cumpliendo cu e puntonan den un contract WEB Aruba NV a hasi e entrega nan di e meter di awa hunto cu e tempo ey ex minister sr. Crispin Romero kende cu e tempo ey Sector Primario tabata resorta.

             Un di e puntonan den e contract di WEB Aruba NV hunto cu Departamento di Agricultura, Cria y Pesca, Santa Rosa ta cu cada tanto tempo Departamento di Agricultura, Cria y Pesca Santa Rosa tin e tarea pa hasi un bishita pa asina controla con e uzo di awa di e tarifa ahusta aki di AWG 5.50 ta bay. Si ta cumpliendo cu e puntonan den e contrato manera entre otro con e produccion ta bayendo. Si ta uzando e awa pa e meta cu eta wordo destina. Mira tambe si ta hasi uzo di sistemanan di irigacion. Kico ta e diferente productonan cu ta wordo planta. Cuanto ta e cantidad cu ta wordo planta y cosecha final. Kico ta wordo planta. Scucha tambe kico por ta nan opinion pa cu e meter di awa cu e tarifa special aki. E parti mas esencial di henter e proceso aki di parti di Departamento di Agricultura, Cria y Pesca, Santa Rosa ta keda duna conseho con pa atende cu e awa y con na un mihor forma atende bo cultivo y pa mas tanto bo beneficia di e awa aki y mantene bo gasto di awa controlabel.

            Generalmente na momento cu Santa Rosa a bishita tur esnan cu tin e meter specifico aki tur tabata tin bon comentario  y sigur nan ta sumamente contento y agradecido pa e ayudo aki pa asina nan por sigui cultiva y mantene na gasto di awa na un prijs pagabel.

            Di parti Santa Rosa nos lo sigui hasi control y duna conseho na bienestar di Sector Primario di Aruba.