Director di AZV cu hopi gratitud pa sector medico:
ORANJESTAD (AAN) – Director di AZV, Edwin Jacobs, a hiba palabra den conferencia di prensa convoca pa Minister Dangui Oduber, tocante e decision di a para e recorte di 5.5% riba cuido medico cu Hulanda a impone.
Director Edwin Jacobs a bisa cu manera Minister di Salud a indica, tabata bao circumstancianan dificil cu AZV a haya su mes ta acepta condicionnan impone riba Aruba.
Jacobs a recorda dia 2 di Mei 2020, esta tres aña pasa, cu e tabata forma parti di e Comision cu Gobierno a instala pa wak con ta bay haci pa atende cu 45 mil persona cu e momento ey no tabata trahando y con ta bay haci pa tin y mantene pan riba mesa.
El a bisa cu na inicio a pensa riba un suma igual rond di 950 florin y na caminda ora cu a cuminza concretiza e palabracionnan cu Hulanda, e subsidio di salario a garantiza mucho mas cu 950 florin nominal pa tur persona.
“Pero el a bin cu su condicionnan y un di e condicionnan di mas fuerte, si no ta esun di mas fuerte, tabata e recorte di promedio di 5 miyon florin pa luna, 60 miyon pa aña, den sector di cuido.
Na e momento ey e minister a haci un apelacion na e sector di cuido cu un recorte di 5.5% cu no tabata facil. Pero danki na e colaboracion di e sector nos por a cumpli cu e condicionnan cu na aña 2020, aña cu mas AZV tabata tin mester di gobierno, gobierno por a contribui cu casi cien miyon florin pa cubri gastonan di AZV. Asina deteriora nos situacion tabata na 2020”, Edwin Jacobs a señala.
Jacobs a señala cu no por a lubida, y ta reitera con e situacion tabata y con a cana e caminda aki pa por a yega awe na e decision tuma. Jacobs a bisa cu por a mira un recuperacion economico aña pasa cu a permiti hasta tin un tiki surplus den e fondo. “Tabata momentonan duro y pesey den nomber di e Organo Ehecutivo di AZV tambe, e kier a gradici e sector di cuido, tur e trahadornan, cu ademas di a duna un enorme contribucion bao circumstancianan dificil cu un virus cu na dado momento ningun di nos tabata sa ki impacto e por tin, a lanta tur dia bay trabao pa percura pa cuido di nos hendenan”, Director di AZV a subraya y a expresa masha, masha danki pa nan contribucion.
