Director di Hospital:
ORANJESTAD (AAN): Diamars mainta durante un conferencia di prensa di minister di Salubridad Dangui Oduber tocante e paro di recorte di 5.5% den sector di cuido, director di hospital Jacco Vroegop tambe a hiba palabra.
El a trece dilanti cu e ta contento cu e por papia di bon noticia.
“Nos ta contento di tende cu porfin 5.5% ta bin bek pa cuido y pesey mi kier gradici e minister y AZV cu apesar di tur dificultad, tabata tin e curashi di tuma e decision”.
E placa envolvi ta di pueblo di Aruba y merece di ta pa pueblo di Aruba den cuido, segun Vroegop.
El a sigui bisa cu na 2020 ora cu a bin cu e recorte a bin, no tabata tin mucho otro opcion y cu hunto nos a acepta cu nos mester a entrega.
“Den un tempo hopi dificil pa nos tur, nos a percura pa e pais por a sigui draai”.
No solamente pa loke ta cuido, sino tambe e industria di turismo entre otro y tur otro cosnan cu mester a continua manera awa, luz etc., segun e director di hospital.
Vroegop a sigui bisa cu hunto tur hende a demostra cu Aruba ta un pais resiliente cu un pueblo resiliente.
El a sigui bisa cu e ta contento pa bisa cu e ta sigur cu den hospital e empleadonan dia y anochi tabata para cla pa sigui traha.
“Pa e empleadonan aki pues tabata hopi amargo cu un parti di nan salario a wordo corta”.
Cerca tur hende esaki a sosode, pero e hendenan aki mester a sigui traha hopi duro y den e tempo ey hopi aspecto di e virus ainda tabata desconoci y e tension riba kico por a pasa cubo como persona tabata hopi grandi.
E empleadonan tabata bisti completamente tapa y cu mascara, practicamente entregando nan bida pa otro hendenan.
Mi ta hopi contento y agradecido cu e hendenan aki a haci esaki pa tur di nos na Aruba, segun Vroegop.
El a bisa cu pesey e ta contento cu a bin un paro riba e recorte awor.
“E placa cu nos ta bay haya bek, nos tin mester di dje hopi mes, pasobra bida a bira hopi caro pa tur hende”.
E placa ta bay wordo uza pa por yuda pueblo mihor ainda pa loke ta dunamento di cuido y banda di esaki nos lo por aumenta e salarionan di personal.
Den e siman y lunanan cu ta bin nos ta bay papia cu e sindicatonan riba esaki, segun Vroegop.
