Secrets Hotel ta bay beneficia specialmente pueblo desemplea cu tin na San Nicolas

Errol de Freitas ta urgi pueblo pa pone nan firma

ORANJESTAD (AAN): Diamars mainta na Kulture Cafe den Nicolaas Store na San Nicolas, na un tono fuerte, Errol de Freitas, kende ta president di San Nicolas Business Association (SNBA) a bisa cu nan ta bay manda un mensahe claro.

   Nan kier pa cueste loke cueste, e proyecto di Secrets Hotel na Colony bira realidad.  “Nos ta hacie pasobra San Nicolas merece posibilidad y progreso,” el a indica.

   E ta referi aki na e hecho cu 3 habitante di Colony a acudi na Corte di Husticia pa asina trata na stop e proyecto di Hotel Secrets cu ta wordo construi eynan, door di un compania prestigioso di exterior, y cu den futuro lo wordo maneha door di cadena hotelero Hyatt.

   De Freitas ta haci suplica na comunidad, pa pensa tur kico esaki lo nifica pa pueblo di San Nicolas y pariba.  Pa e miles di hende na San Nicolas cu aworaki ta sin empleo, y cu lo por facilmente cuminza bay traha na e Hotel nobo.

   Y pa produci prueba cu Aruba henter ta sostene e Hotel aki na San Nicolas, nan ta start riba Diamars mes cu un accion di firma.   E accion di firma a start 1 Augustus 2023, y e deadline pa esaki ta Dialuna dia 28 Augustus 2023.

   E accion di firma aki no ta djis dirigi riba e ciudadanonan di San Nicolas, sino pa henter Aruba.

   “San Nicolas merece un oportunidad,” Errol de Freitas a indica.  Tur hende sa cu e banda pabao di Aruba tin hopi hotel mas na caminda, pero bo ta haya turistanan cu ta enbusca di “lugarnan organico” pa hospeda.  Sikiera awor na San Nicolas cu e Secrets Hotel, nan por organiza esaki, dune su structura, y pensa tur loke e ta bay nifica pa pueblo di Pariba di Brug.

   Esnan cu kier participa den nan Accion di Firma, e president di SNBA a indica cu esaki lo tey riba nan social media y tambe website.  Pero lo bay publica di lugarnan unda tur hende por yega pone nan firma riba e lista.  Manera DIARIO a menciona anteriormente, SNBA ta yama e campaña aki como “Say Yes to Secrets”.

   E campaña di firma lo dura como 3 siman, y prome cu esaki a start ya caba SNBA a ricibi asina hopi feedback riba e idea, incluyendo Clubnan Deportivo, di Iglesianan, Comerciantenan, y tambe di pueblo cu tin speranza cu via di esaki porfin nan lo por haya un trabao.  “Nos ta haya yamada di hendenan di Playa y distrito di Noord, kendenan ta bisa cu nan tambe ta ‘pro’ y ta puntrando caba unda nan por bay firma,” De Freitas a splica cu un muestra di satisfaccion riba su cara.

   E caso den Corte ta trece e proyecto den peligro.  E tempo cu ta keda rek y rek e construccion, ta bay cuminza tin influencia riba e desaroyador di proyecto, y e contratista.  Pasobra si nan stop cu trabao, tin di corda cu e payroll ta sigui draai.

   Errol de Freitas ta adverti, cu si acaso e desaroyador fada y dicidi na hala atras, Aruba lo por bay haye confronta atrobe cu mesun situacion similar cu loke a pasa tempo di Racetrack, y tambe tempo di Beta Hotel y Plantation Hotel, cu Aruba mester a paga miyones.

   Secrets Hotel ta un proyecto di 234 Miyon, y lo ta prepara di paga algo asina na daño?  Of ta prepara pa disfruta di e frutonan cu e lo duna e isla, y cu hasta tin rapportnan independiente cu ta indica cu Aruba lo bay disfruta di riba un 1 biyon Florin di beneficio danki na e hotel aki.

   E hotel cu lo bin cu su landscaping pa traha un paisahe bunita, pa haci Colony bek mas bunita cu hopi mata atrobe, cu lo atrae parha y mas.  Y net esey e 3 habitantenan ta full contra dje?

   President di SNBA a bisa cu nan a ricibi critica tambe, y ta pidi pa laga San Nicolas manera cu e ta.  Pero net esnan cu ta criticando, ta haci esey for di confort di nan stul na nan trabao.  Nan tin empleo vast, y no ta worry cu nada cu e miles di ciudadano di San Nicolas cu ta desemplea aworaki, y cu lo bay wordo beneficia cu yegada di Secrets Hotel aki.