Secretaris General di UNESCO Aruba a duna un splicacion cortico con UNESCO Aruba ta funciona

ORANJESTAD (AAN):  Recientemente durante un Conferencia di Prensa en conexion cu 35 aña Aruba como miembro asocia di UNESCO,

sra. Marushka Tromp Secretaris General di UNESCO Aruba a duna un splicacion tocante di UNESCO Aruba y con e ta funciona. Sra.Tromp a informa cu e meta di Comision Nacional di UNESCO Aruba ta fortifica e ehecucion di e mandato di UNESCO door di informa y consientisa e comunidad di Aruba na un forma concreto y tangibel, tocante di e trabounan di UNESCO Aruba y nan importancia pa Pais Aruba. 

Areanan di mandato di UNESCO

            E Secretaris General di UNESCO Aruba a informa tocante e areanan cu UNESCO tin un mandato riba dje, cualnan ta Educacion, Ciencia, Cultura, Comunicacion y Informacion. UNESCO su meta final ta pa sociedadnan rond mundo interconecta di tal forma pa yega na un cultura di pas. UNESCO international ta traha pa cada area a base di programa, proyecto, recomendacion pa maneho y/of convenionan. 

            Riba cada un tereno tin varios tema cu UNESCO Aruba ta trahando conhuntamente cu stakeholder local y internacional pa nan realisacion. Algun tema ta mas avansa cu otro, algun ta mas visible y ya por a sinti nan impacto, algun di nan ta den desaroyo continuo. Sra. Tromp a subraya cu nos mester puntra nos mes kico ta loke ta conecta e temanan na otro. Kico cultura tin di haber cu clima? Con cultura ta influencia ciencia y educacion? Con deporte ta un catalisator pa pas y salud mental? 

Instrumentonan riba nivel local

            UNESCO Aruba ta funciona den practica cu specialistanan riba cada tereno pa hunto cu stakeholders realisa e temanan di cada un tereno. Cada sprecialista ta specialisa riba nan area y tambe riba e programa di UNESCO internacional y lo usa un approach basa riba, entre otro, investigacion, prioridad, inovacion y colaboracion intersectoral pa hunto cu cada ‘stakeholder’ relevante duna contenido na un tema riba nivel di maneho, programa, proyecto y/of un combinacion. UNESCO tin un Programa di Participacion cu ta duna sosten financiero na proyectonan di NGO’s den e areanan di UNESCO. Cada dos aña paisnan por entrega un maximo di siete proyecto y cu aprobacion di UNESCO Paris, e NGO ta ricibi un montante pa financia e proyecto.  

UNESCO Aruba

            UNESCO Aruba ta consisti di un Comision Nacional pa UNESCO (NUC) y un Secretariado. NUC cu ta wordo presidi pa Minister di Cultura, sra. Xiomara Maduro,  como vice-presidente sra.Annemarie Proveyer-Groot y tin sr.Peter Scholing, sra. Regine Croes y sr. Siegfried Dumfries como miembro.

            E Secretariado ta consisti di sra. Marushka Tromp,  Secretaris General di NUC, como specialista riba e tereno di Educacion, ta  sra. Nora Eleonora, como specialista riba e tereno di Cultura sra. Ruby Eckmeyer, como specialista riba e tereno di Ciencia Sr. Marck Oduber y documentalista di e Secretariado ta sra. Suhail Zaandam.