Secretario-General di Nacionnan Uni ta pidi negoshinan rond mundo pa duna empleo na hendenan autista

NEW YORK: Secretario-General di Nacionnan Uni, Ban Ki-moon den siman pasa a lanza un ‘Call to Action’ invitando negoshinan pa haci dedicacionnan concreto pa duna empleo na hendenan autista.

   Su yamada a wordo haci durante un evento na Nacionnan Uni ora di observa World Autism Awareness Day, unda e Secretario-General tabata acompaña pa lidernan di negoshi di Microsoft, SAP, y Towers Watson, entre otro.

   “Reconociendo e talento di personanan riba e spectrum di autismo, envez di enfoca riba nan debilidadnan, ta esencial pa crea un sociedad cu di berdad ta inclusivo,” e Secretario-General a bisa den su prome palabranan.

   Investigacion a sugeri cu ta un bon negoshi (y mihor pa bon resultado), pa empleadonan tuma ventaha di e habilidadnan cu hendenan autista tin den gran abundancia, compara cu e trahadornan ‘neurotipico’, pues mihor habilidad den reconocemento di patronchi y razonamento logistico, y nan tin mihor atencion pa detaye.

   “Pero toch hasta unda concientisacion ta halto, mas di 80% di adultonan autista ta sin empleo,” e Secretario-General a bisa.  “Pesey ta importante pa negoshinan compronde nan capacidadnan unico y tin biaha habilidadnan excepcional, y cu por duna nan ambiente di trabao unda nan por sobresali.”

   E asina yama “Call to Action” ta invita dunadornan di trabao pa publicamente expresa nan dedicacionnan boluntario riba e website di business.un.org cu ta e plataforma crea pa United Nations Global Compact pa asina laga companianan expresa nan dedicacion pa sostene meta y asuntonan di Nacionnan Uni.  E yamada ta recomenda cu empleadonan haci varios promesa di lo aumenta e proporcion di nan forza laboral cu ta consisti di hendenan cu ta riba e spectrum di autismo.

   Un variedad amplio di iniciativanan di sector priva pa habri cuponan di trabao pa hendenan autista, a wordo presenta na Nacionnan Uni pa observa e dia ey.  Ademas di Microsoft, SAP, y Towers Watson, companianan presente a inclui CAI, Ernst & Young, Freddie Mac, Hewlett-Packard, Oliver Wyman, Rising Tide Car Wash, y ULTRA Testing.

   E discurso principal a wordo duna pa Gobernador Jack Markelle di estado di Delaware, kende como President di National Governors Association na Merca a carga un iniciativa di un aña largo pa aumenta empleo di hendenan cu desabilidad.

   For di Aruba a forma parti di e foro “Call to Action”, dos hoben autista esta Byron Lesire kende a duna un discurso (publica Diasabra caba den DIARIO), e dama hoben Kay Quandus, y tambe Stephany van der Biezen-Croes, y Carolina Thiel-Span di Fundacion Autismo Aruba.