ORANJESTAD (AAN): Recientemente, Minister di Husticia y Asuntonan Social sr. Rocco Tjon,
a sera conoci cu Secretario di Estado nobo di relacionnan di reino sr. Zsolt Szabó, y hunto cu su delegacion a haci un bishita na insitituto coreccional pa asina haya un bista di e infrastructura y alavez a haya un splicacion amplio di e diferente plannan cu tin riba mesa.
Manera ta conoci alrededor di dos aña pasa e structura di e organizacion, pues e formatie rapport a worde adapta, pa di e forma ey, como organizacion, KIA por brinda e servicionan cu nan mester brinda y alavez garantisa miho siguridad pa nan propio personal. Actualmente, danki na e reogranisacion, tin diferente proyectonan andando, caminda structuralmente tin diferente programanan ta worde brinda na detenidonan caminda nan por sigui diferente curso y opleiding pero tambe ta forma parti di varios proyecto pafo di KIA, caminda nan ta haci diferente trabao pa nos comunidad.
Na mes momento, pa loke ta trata e cuido, tin diferente cambionan a tuma luga, no solamente e renobacion completo pa loke ta trata e “medische dienst”, pero tambe a introduci un metodo nobo di traha specificamente pa nos hobennan cu yama “youturn methodiek”. Esaki ta un metodo cu ta worde uza den tur e institutonan na Hulanda, di e forma ey nos ta trata na inverti den e organizacion. Sin mas, e ta keda importante y prioridad pa por logra percura pa un instituto coreccional completamente nobo.
Esaki ta algun di e plannan cu a worde presenta na e Secretario di Estado, pa cual dentro di poco un business case ta bay worde skirbi door di un organizacion cu tin hopi experiencia pa cu tematica aki. Di e forma aki nos lo tin un producto final pa por presenta y delibera cu Hulanda, pa wak con nos ta bay percura pa financia esaki.
E parti infrasrtructural ta keda un elemento importante mirando cu esaki tin un impacto riba procesonan, no solamente di siguridad, pero tambe riba lokual lo por brinda tur e detenidodnan, pa asina na final di dia por garantisa un resocialisacion y un reintegracion back den nos comunidad exitoso.
Minister Tjon ta wak back riba un reunion sumamente positivo, caminda lo sigui delibera cu e ekipo di e Secretario di Estado pa por logra haci esaki un realidad.
