Scouting Aruba ta fortalece participacion di hobennan cu su Communications Team

ORANJESTAD (AAN): Scouting Aruba a duna comienso na un trayecto di formacion pa su Communications Team.

E team a forma despues di un invitacion na tur hoben cu interes pa participa den e comunicacion di e organisacion. Esnan cu a mustra interes a uni na e iniciativa. 

Cu e iniciativa aki, Scouting Aruba kier involucra hobennan mas activamente den e organisacion y den toma di decision. E programa scout ta dirigi na nan mes, y pa e motibo ey e organisacion kier duna nan mas espacio pa expresa nan ideanan y contribui na su desaroyo. 

E actividad a cuminsa cu un desayuno, caminda e miembronan a intercambia ideanan y papia tocante e proposito di e team. Despues, nan a participa den un workshop guia pa Paula Carrion di Oficina Regional Interamericana di WOSM (ScoutIAR). 

Durante e workshop, Paula a guia e hobennan pa explora nan pasion pa comunicacion, compronde e diferente tareanan y pensa riba e metanan cu nan kier logra como team. Un di e puntonan central tabata defini kico nan kier cu e comunidad sa di Scouting Aruba. 

E team kier mustra cu Scouting ta combina diversion cu educacion, crea amistadnan pa bida y prepara hobennan pa bida. Tambe kier destaca e compromiso di Scouting cu un ambiente sigur pa crecemento y desaroyo, y e oportunidadnan cu e organisacion ta ofrece tanto na hobennan como na adultonan. 

E Communications Team ta conta cu Jetrow Boekhoudt como Producer, Samantha Romero como Public Relations, Brayden Maduro como Photographer, Phillip-Johnson Martinus como Videographer, Elaine Caminata como Copywriter y HKC Ilienne Corsen como Brand Officer. Natisha Kock, Edmira Christiaans y HKC Adeline tambe ta forma parti di e team, cu apoyo y guia di HC Dave Martinus como SFH Advisor. 

Como prome reto practico, e hobennan lo prepara un publicacion tocante trabou voluntario na Aruba, uzando e logo di Volunteer Year di ScoutIAR. E proximo workshop, Representing Scouting, ta programa pa dia 21 di november. 

E directiva di Scouting Aruba a expresa su orguyo pa e hobennan cu a acepta e reto. E team lo contribui na comparti e actividadnan y historianan di e gruponan, mientras e miembronan ta desaroya nan talento y siña traha hunto.