Meverly Romano, PR di DIMP:
ORANJESTAD (AAN) — Meverly Romano, Relacionista Publico di Departamento di Impuesto (DIMP), den su entrevista cu DIARIO, tocante e pago di numbernan di auto, a menciona cu e personanan cu ta cumpra un auto nobo y no tin un number nan ta hay’e mesora, manera nan paga nan seguro di auto y e belasting, nan por busc’e. DIMP ta yuda nan tur dia entre 11’or cu 12’or, mescos cu e personanan cu tin plach'i auto.
Meverly a agrega cu tur dia nan ta haci cambio di agenda y caminda tin espacio pa yuda mas persona, nan ta schedule e citanan, pero e meta principal ta: 1: percura pa tur hende tin nan plachinan y 2: pa no tin acumulacion di multitud na e otro banda. E edificio ta chikito, y mester tene cuenta cu e espacio cu tin eynan, nos no kier haya manera den pasado, un 500 mil hende na porta, caminda un ta keda pasa dilanti di otro, un ta insulta otro, y pa e motibo aki nos a introduci e sistema di cita, e ta bayendo bon.
Nos tin tambe un encuesta tumando lugar, cu e personanan cu a wordo yuda pa su mañan nan ta haya un mail cu e encuesta. Nan no ta obliga pa contesta e preguntanan, pero si nos ta recomenda pa haci’e, pasobra esey ta un manera cu nos ta midi e servicio, y esaki ta completamente anonimo”, Mervine Romano a menciona.
El a subraya cu DIMP su score di satisfaccion ta na 95% y mayoria persona cu ta bin busca nan plachinan, ta hopi satisfecho cu e servicio cu nan ta haya.
