Scolnan a ricibi “caha sabi” cu articulo y informacion di e fiesta di San Juan – Dera Gai

Departamento di Cultura:

ORANJESTAD (AAN): E siman aki ta celebra e Fiesta di San Juan – Dera Gai. Relaciona cu esaki e siman aki Departamento di Cultura a organisa presentacionnan escolar na Cas di Cultura y esaki lo continua otro siman.

            Departamento di Cultura a bishita varios scol y a entrega e “Caha Sabi”. E caha aki a wordo prepara pa Departamento di Cultura specialmente pa scolnan pa asina nan por celebra e Fiesta di San Juan.

            E caha ta contene un calbas, e paña cu ta wordo usa pa tapa wowo y e palo cu ta baila cu ne. Ademas tin informacion di historia di celebracion di San Juan, e buki di Wantomba y Fiesta di Dia di San Juan – Dera Gai.

            E scol ta ricibi tambe un usb cu cancionnan y video di San Juan. Esaki ta pa e scolnan por tin e materialnan educativo y informativo pa asina e docentenan por usa esaki den nan lesnan pa nos muchanan sera conoci cu e fiesta di San Juan – Dera Gai y asina conoce mas di nos cultura y nos fiestanan tradicional.