Scol Saludable ta un concepto hopi integral unda e actividadnan ta wordo entrega den un structura

Swinda Dumfries, Consehero di Scol Saludable:

ORANJESTAD(AAN) – Señora Swinda Dumfries, funcionario di Departamento di Salud Publico, actualmente den e funcion di Consehero di e Coordinadornan di Scol Saludable.

            Den entrevista cu DIARIO el a menciona cu recientemente nan a caba di haci un training pa coordinadornan y conseheronan di Scol Saludable. El a splica cu e conseheronan ta esnan cu ta guia scolnan den e proceso di bira scol saludable, y e coordinadornan ta esnan cu ta na scol mes cu ta bezig cu e proceso di scol saludable, hunto cu partnernan cu tin intervencionnan cu por wordo uza pa e tema cu scol ta bezig cu ne.

            Un total di 18 maestro, entre nan cabesante tambe a participa y a haya certificado. El a relata cu e curso di consehero di scol saludable ta mas tanto pa esnan cu ta haya conocemento, experticio, y vooral, cu ta compronde e concepto di scol saludable.

            Señora Dumfries a comenta cu hopi hende ta kere cu scol saludable ta solamente tocante e tema kico pa come y pa bebe, pero e ta un concepto hopi integral, pasobra vooral e actividadnan ta wordo entrega den un structura unda cu scol ta haya un miho bista riba kico nan tin cu traha. No solamente actividadnan los, pero tur cos ta wordo entrega den kico nan ta señala, den kico lesnan tur ta haci na e tema ey, kico nan ta haci pa mayornan y nan por ancra tur actividadnan den maneho di scol, cu ta e parti di maneho di salud den scol.