Scol Saludabel Aruba cu training pa Docentenan di Scol Primario

Muchanan saludabel ta desaroya y presta mihor

ORANJETSAD (AAN); Den siman di 21 te cu 25 augustus 2023 Scol Saludabel Aruba ta organiza un training di e Metodo ‘Leefstijl’ pa grupo di maestronan (Movecion y Salud , coleganan docente, Interne Begeleider y /of schoolleider).

   E maestronan ta di Dienst Publieke Scholen (DPS) y e diferente schoolbesturen: SKOA y SPCOA. E training a worde duna na Surfside Marina Aruba door di e trainer di e metodo Señora Edmee Warneke. Cada dia lo tin un grupo diferente  di scolnan cu lo asisti na e training. Un total di 56 scol lo asisti na e training durante e siman aki.

   DIARIO a compronde cu e meta di e training di ‘Leefstijl’  ta pa brinda e maestronan un metodo cu ta duna e muchanan e conocemento, habilidad y actitud positivo  riba e tereno di salud mental, emocional y salud fisico. E programa ta stimula e desaroyo y bienestar general cu enfoke riba prevencion.

   E leefstijl training ta  ofrece nos maestronan un metodo cu ta structural y duradero y cu e meta cu na final di e trayectorio, nos muchanan ta mas  resiliente y por haci escohencianan saludabel den area di bida fisico, di nutricion y social emocional (mental). E siman a cuminsa cu trainingnan cu tabata fructifero.

   A haya sa, cu loke a resalta den feedback di e docentenan ta cu e experiencia pa cu e metodo ta cu e ta ‘hands on’ y cu e  ta duna nan direccion pa por logra nan metanan.

   Señora Swinda Dumfries, coordinador di team Gezonde School Adviseurs y Sr. Giovanni Leocadia  cu colaboracion di IPA (opleiders Movecion y Salud) lo coordina y stipula e trajecto di implementacion y sosten pa e scolan cu lo uza e metodo. E trajecto aki no por a worde realisa sin e compromiso y sosten di e directornan di  DPS y schoobesturen SKOA y SPCOA pa cual nos ta sumamento agradecido. Scol Saludabel Aruba conhuntamente cu IPA ta duna tambe un danki special na minister Dangui Oduber, minister Endy Croes y minister Rocco Tjon pa nan sosten na Scol Saludabel Aruba. Tambe un danki grandi ta bay na Fundacion Prevencion den Salud y Departamento Salud Publico cu a pone e fondonan disponibel pa por a realisa e training aki na Aruba y pa por a adkiri e material di e metodo Leefstijl.

   Scol Saludabel Aruba lo sigui informa ariba e  futuro desaroyonan y implementacion di e metodo Leefstijl.