Scol Dun’un Man a amplia les educativo cu les expresivo y creativo y ta bayendo hopi bon

Cabesante di scol Juffrouw Sharline, ta splica:

ORANJESTAD (AAN) –Sharline Geerman-Rodriguez, Cabesante di Scol Dun’un Man, den entrevista cu DIARIO a menciona cu semper el a pensa cu e parti creativo di nan alumnonan mester wordo desaroya hopi mas, di loke nan ta haya normalmente den  klas. E oportunidad a presenta pa un proyecto unda e creatividad di e muchanan ta wordo desaroya.

Normalmente nan ta haya les di pinta, y obra di man, pero scol kier surpasa esaki. E oportunidad a presenta y nan a papia cu Juffrouw Tarah Terhorst, cu di biaha a gara e proyecto cu dos man, y a sondea kico tur tin na posibilidad pa haci, y e enfoke principal di e proyecto aki no ta e producto final, ta mas e proceso, e aspecto di desaroya, hunga cu e materialnan, kico bo por crea cu ne cu un trabao na final cu ta super bunita. E ta mas pa e muchanan sinti nan mes liber pa por expresa nan mes.

Juffrouw Sharline a subraya cu den esaki Tara ta logrando hopi cerca e muchanan.

Manera ta conoci e alumnonan di Scol Dun’un Man ta muchanan cu tin un limitacion intelectual. “Ora nos ta papia di limitacion intelectual, nos ta para keto na IQ, nos ta papia cu muchanan entre 50 cu 60 number di IQ (Coeficiente Intelectual), pues nan tin hopi dificultad pa compronde y siña algo” Juffrouw Sharline a splica.

Tur cos mester ta hopi visual, ta rekeri di hopi practica, kiermen prome cu nan logra. Esey no kiermen cu nan no ta logra, pero nan ta bay mas poco, poco.

Juffrouw Sharline a indica cu un bez cu e mucha ta sinti su mes liber pa expresa y safe, e por siña hopi mas: “E ta bay ta mas facil den klas pa anda cu ne, e ta mas dispuesto tambe pa colabora cu e maestro, pa e  por siña su lesnan y haci locual e tin cu haci.

E parti aki a yuda e muchanan crece mas den nan proceso. E programa aki a bin pa keda y e ta algo cu nos kier sigui cu ne y durante e aña e ta bay conoce solamente ampliacion”, Juffrouw Geerman a señala.

El a añadi cu intencion di Juffrouw Tara ta pa otro aña sigui cu “drama sin palabra”, e aña siguiente lo añadi e parti di musica. Tin hopi desaroyo internacional na Hulanda na Curacao y Bonaire riba e parti musical, y  nos tambe kier ofrece esaki na nos muchanan.

“Mester pensa akinan ideanan manera Leerorkest cu tin den scolnan regular, algo parecido pa nos muchanan tambe”, Cabesante Juffrouw Sharline a subraya.

El a agrega cu el a scucha cu tin demanda grandi pa scolnan special, y Scol Dun’un Man ta prepara pa tuma e muchanan aki si ta necesario. “Nos ta ofrece e muchanan e parti educativo, y aworaki ademas e parti expresivo y creativo. Nos tin actualmente 66 alumno y nos capacidad ta yega te na 72”, Juffrouw Sharline Geerman-Rodriguez, cabesante di Scol Dun’un Man a conclui.