ORANJESTAD (AAN): Na comienzo di luna di Mei, semper ta observa “Dia di Cabezante di Scol”.
Esaki ta pa reconoce e importancia di e cabezante, of director, of rector di tur scol. Principalmente tur e trabao cu nan ta haci pa mehoranza di scol.
Pesey mes, docentenan di Scol Basico Xander Bogaerts na San Nicolas, a dicidi na honra nan cabezante. Esey ta debi cu nan ta opina cu tras di cada scol tin un tremendo cabezante, y esaki sigur ta e caso na nan scol.
Pa tal motibo, riba e Dia di Cabezante, nan a gradici Juffrouw Nadia pa tur su guia, pasenshi y cariño cu e tin pa tur docente y tambe pa alumnonan.
El a haya un bunita regalo y palabranan elocuente pa su bon trabao cu e ta haciendo den e poco tempo cu e tin como cabezante na e scol.
