Mas alarma pa raket di Iran contra supuesto terorista na Irak y Syria
*Cifranan di importacion di Aruba central den e riesgo economico local
*Guera y e impacto di importacion di Free Zone y pa mercado local
ORANJESTAD (AAN) — Na Siglo 20 e entrada acelera di medionan nobo pa hende comunica directamente cu otro, a aumenta e resultadonan di y reaccionnan riba desaroyonan mundial y local.
E realidad aki ta exigi di medionan di comunicacion, pa ta sumamente alerta con informacionnan cu mester wordo suministra na un comunidad, ta duna tambe prioridad na e forma cu publico ta wordo afecta.
Medionan di comunicacion mester capta continuamente e resultadonan di nan informacionnan riba publico, cu sigur despues di e Pandemia Covid-19 como hende ta posiciona su mes di un banda na un forma cu e no kier tende mas problema y noticia fastioso, pero na mes momento mester ricibi noticia corecto pa e por actua na su bienestar sigur den un situacion manera mundo conoce actualmente.
E drama humano cu a presenta na Medio Oriente, durante ultimo 100 dia tin un impacto enorme riba hende pa e peliger cu e ta pa seguridad mundial, pero tambe pa e horor humano cu ta uni su mes na Ukraine y tanto otro sitio cu ta skirbi historia di violencia mundial atrobe y a deshaci di tur grado di seguridad.
E situacion mundial tin impacto creciente, manera a keda demostra ayera cerca personanan cu ta acerca DIARIO despues cu a bira conoci cu Iran a lansa raketnan contra supuesto teroristanan na Irak y Syria.
Prome cu DIARIO a bay imprenta hasta tabata wordo papia di explosionnan cu a wordo scucha den vecindario di e Consulado Mericano na Irak.
Informacionnan preocupante ta sigui otro y intrankilidad ta alcansa sigur e persona cu no ta ricibi tur informacion cu e mester ricibi.
Durante ultimo dianan, informacionnan a drenta riba e forma cu e ruta di mercancia y comercio importante pa mundo, a bira peligroso pa transportacion maritimo y cu esaki por crea problemanan pa mercadonan rond mundo.
Ta berdad cu na e momentonan aki tin un crisis maritimo na uno di e zonanan importante cu ta conecta trafico maritimo di Oceano Indio pa Oceano Atlantico y vice versa.
Esaki ta afecta sigur e situacion comercial mundial, pero grado di gravedad y peliger ta depende di diferente factor.
Pues, poniendo un banda tur posibilidad cu e actual situacion di guera rond mundo ta presenta, no por pone e posibilidad di scarcedad di sigur cuminda y productonan importante pa Aruba, na nivel di loke a pasa durante Pandemia Covid-19.
E coronavirus a paralisa produccion mundial y economia mundial.
Na e momentonan aki, manera DIARIO a splica su lectornan debidamente, lidernan comercial y di gobierno di rond mundo, ta reuni den e Forum Economico Mundial, cu mester a bira un ocasion di aliento pero ayera a expresa e resultadonan cu e situacion di guera na mundo, tin pa economia mundial, cu manera DIARIO a prepara Aruba, lo ta marca pa cambionan grandi sigur riba tereno di trabou y avance den e era di computer.
Pa e Pueblo Arubano cu DIARIO mester informa debidamente, ta sumamente importante comprende cu tin motibo cu e impacto di e crisis na Medio Oriente no ta duna indicacion cu Aruba por spera situacionnan manera el a experencia riba tereno di produccion durante e Pandemia cu a causa un scarcedad mundial pa falta di produccion.
Den e situacion actual, loke ta importante ta, cu Aruba no ta depende directamente di loke e region afecta, ta produci.
E ruta maritimo, e ruta pa barconan di mercancia alcansa Aruba for di Oceano Pacifico y e zona di guera y su vecindarion, ta afecta e transportacion maritimo for di un cantidad hopi limita di paisnan cu ta riba e lista di importacion di Aruba.
E cifranan di balor di exportacion di paisnan pa Aruba, ta mustra cu economia di Aruba ta depende for di 2018 na prome lugar di Merca.
Importacion di Merca pa e mercado local di Aruba y Free Zone ta representa 6.407 Miyon .
E cifra pa importacion for di Hulanda ta 1.726 Miyon.
Importacion total for di China den e periodo aki tabata 531 Miyon, di Korea del Sur 160 Miyon, di India 76 Miyon y Thailand 27 Miyon.
Pues aki mester compara e importacion for di paisnan den vecindario of conecta na Oceano Indio, cu mester pasa pa Oceano Atlantico y e suma di importacion na Aruba.
Ora mira cifranan di balor di importacion den porcentahe, ta topa atrobe cu Merca y Hulanda como mas paisnan cu mas peso pa importacion, cu ta dicidi riba suficiente cumplimento cu e demanda di Aruba.
Cu esaki DIARIO ta entrega Aruba prueba cu na e momentonan aki mester tene cuenta cu Aruba como parti di henter mundo ta den un situacion excepcional cu mester wordo atende na un forma realistico pa publico por ta prepara cu sano huicio riba na prome lugar, riba e tarea di tur hende cu ta e bienestar colectivo riba tur tereno.
