Scarcedad di klapchi lo por trece menos incidente di quemadura

Bombero di Aruba ta haya esey algo positivo...

ORANJESTAD (AAN): Desde mey-mey di aña 2024 caba, e seccion di Departamento di Prevencion di Cuerpo di Bombero di Aruba a bin ta preparando pa temporada di Klapchi pa fin di aña.

   Francis Toussaint di e Departamento aki, a splica cu despues di tur preparacion, ora cu December yega ta e momento cu nan ta cuminza ehecuta tur protocol, control, y revision di e explosivonan aki cu ta yega Aruba.

   Segun Toussaint a indica, e enfoque principal di Cuerpo di Bombero den e aspecto aki ta regarda seguridad en general.  For di ora cu e barco di container yega, e bahamento, sigui pa transporte di Waf te na Deposito di Wela, y tambe e momento di transporta tur vuurwerk pa cada negoshi, ta loke Bomberonan ta concentra riba dje.

   E hecho cu Aruba lo bay dispone un cantidad minimo di klapchi awor na final di 2024, tin su pro y tambe su contra.  Toussaint a splica cu tin ciudadano cu pa costumber y tradicion caba, kier despedi di aña coriendo fucu door di tira hopi vuurwerk.  Tiramento di Pagara a bira un costumber anual pa hopi consumidor, sea ta uno gigantesco of chikito.  Pero lamentablemente e aña aki lo no por haya Pagara ningun caminda.  Tampoco a resta Pagara di 2023 cu por wordo bendi di nobo.

   E funcionario di Cuerpo di Bombero toch ta mira cu e stock pober di Klapchi lo por pone cu e aña aki lo bay tin menos incidente, pero toch nan ta sigui activo cu nan campaña di concientizacion.

   “E aña aki atrobe nos ta haci un suplica na e cumpradornan, cu si bo ta cumpra vuurwerk, pa cumpra esaki adapta na edad di e mucha,” Toussaint a indica.

   Hopi biaha ta e muchanan ta sufri incidente, debi cu ta tira klapchi of vuurwerk cu mas bien ta dirigi pa wordo cendi door di un adulto.

   Pesey Bomberonan ta sigui haci suplica na comunidad, pa cumpra vuurwerk segun mucha su edad, y percura pa bo ta presente ora di tira klapchi.  Si bo ta bay traha of sali, percura pa bo no laga e klapchinan atras den poder di e muchanan.  Pasobra incidente por socede e ora mas rapido cu bo ta pensa.