Fundacion Ban Uni Man pa Cria Nos Muchanan a bati alarma:
*Fundacion ta enfrenta deficit basta grandi
ORANJESTAD (AAN): Presidente di Fundacion Ban Uni Man pa Cria Nos Muchanan, John Fun, ta hopi preocupa cu un situacion cu ta reinando actualmente.
El a bisa cu tur aña e tin bon noticianan, pero e aña aki e no tin mucho bon noticia. E fundacion a cera e aña escolar di aña 2020 pa 2021 cu un deficit basta grandi.
Durante e prome 6 lunanan di 2022, nan gastonan tabata surpasa e entradanan pa un averahe di 16 mil florin pa luna.
E fundacion ta yudando 816 mucha y nan a premira problema pasobra a wak cu e reservanan a cuminsa baha . Pero e bestuur semper a bisa cu nan no por wak cu un mucha ta bay scol cu stoma bashi. Pesey a sigui yuda e muchanan.
Prome cu Covid-19 nan tabata yudando rond di 635 mucha. Net despues di Covid-19, e cantidad a subi y a yega na 816 mucha, Fun a splica.
Na Juli, ora e aña escolar a cera a manda un carta pa tur scol cu ta inscribi cerca nan y a bisa nan cu tin cu baha e cantidad di mucha. Mester baha e cantidad di mucha pa luna cu 300 pa por remedia e perdida di 16 mil Florin pa luna, a remarca.
Na lugar di yuda 816 mucha tin cu bah'e te na 500 mucha den promedio. Esaki ta algo duro pasobra tin varios scol cu a acerca e fundacion caba bisando kico nan ta bay haci ya cu tin muchanan cu ta bayendo scol sin pan, a señala.
John Fun a duna di conoce cu pa hopi di e muchanan aki, locual e fundacion ta duna, ta nan cuminda grandi. "E cos ey ta duel nos masha hopi mes, cu nos no por yuda nan. Pero 16 mil florin bo no ta haya den un fundraising door di bay para cant'i caminda cu un collect box. E ta sumanan grandi, a enfatisa.
Fun a sigui bisa cu nan a manda carta na tur club di servicio, varios organisacion grandi solicitando ayudo, pero tin hopi fundacion nobo na Aruba y tur ta purbando di yena un buraco algun caminda y tur mester di placa.
El a agrega cu e competencia ta grandi pa loke ta fondo. "Mi tin ainda speransa cu e pueblo di Aruba lo pasa man riba curason y yuda nos muchanan. Pasobra nos muchanan ta nos futuro di Aruba. Nos tur sa c ora bo ta bay scol cu barica bashi bo no por studia bon. Esey ta e problema cu nos ta confrontando awe".
Finalmente, Fun a indica cu door cu mester baha e cantidad di mucha a dicidi di stop cu Tra'imerdia pasobra esaki ta un 'lunch program' y ta yudando nan, pero nan no ta 'breakfast'. Ya e directiva di Tra'imerdia a acerca e fundacion y bisa pa por fabor wak kico por haci.
A keda di wak con e situacion ta bay ta pa 1 di October, a splica. Ta bay sigui yuda na pa un luna ainda y ta spera cu pueblo di Aruba lo sa di yuda e fundacion y duna un man pa cria e muchanan, John Fun a duna di conoce.
