ORANJESTAD (AAN): Actualmente na algun pais tin scarcedad di hala di galiña, y esey ta bin debi na diferente motibo.
Uno di nan ta e hecho cu tin scarcedad tambe di Containernan refrigera rond mundo, pasobra parce cu mayoria di containernan ta ‘pega’ na China y ta strobando comercio mundial di opera manera debe ser.
Pa varios luna caba, un scarcedad di Chicken Wings a pone restaurantnan na Merca pa subi prijs, como cu nan supplier no ta hayando suficiente di e popular appetizer aki. Un di e motibonan ta cu tabatin demanda halto pa Chicken Wings durante e pandemia, y tambe no tin suficiente trahador pa opera e plantanan di companianan cu ta procesa galiña.
E plantanan no por opera tur nan seccion, y Chicken Wings ta esnan cu ta sufriendo aworaki. Nan a cuminza bira basta caro. Den supermarketnan na Aruba, pakinan di wings cu tin poni den freezer y cu antes tabata costa 6 Florin, awor ta casi yega 9 Florin pa algun hala.
Na Merca mes, den parti noordoost, Chicken Wings normalmente costa entre $1.50 pa $1.70 pa 1 lbs. Pero aworaki e ta costando entre $3 y hasta $4 pa 1 lbs.
Na Aruba, algun negoshi tabata bende Chicken Wings frozen na 5 Florin pa kilo. Awor e ta ser bendi na 7 Florin pa kilo.
Restaurantnan chikito ta haya nan obliga pa hisa prijs, aunke cu restaurantnan grandi franchise a logra mantene e prijs mescos, como cu nan ta mas grandi y por absorba e costo extra.
E revista Bloomberg a raporta recien cu Merca a cuminza ta kedando sin galiña! E demanda pa Chicken Wings y tambe Chicken Sandwich na e pais ta asina grandi, cu pesey awor tin scarcedad.
NO TIN CONTAINER: Internacionalmente, tin problema tambe pa haya Chicken Wings for di pais di Brasil. Aki tambe e pandemia a afecta algun planta, y pa colmo nan tin scarcedad pa haya Container refrigera pa por exporta nan pa paisnan den region y tambe den Caribe. Ta conoci cu na Aruba ta hopi producto di galiña frozen di Brasil ta wordo bendi aki.
E Asociacion ABPA na Brasil, cu ta e Asociacion Brasileño di Proteina di Animal, na e pais tambe prijs di galiña, porco, y webo ta subiendo debi na e costo halto di produccion den e sector. Y net awor cu tin mucho mas desempleo na Brasil, y salarionan birando menos, e lo bay ta un problema pa e pais. Pa colmo no tin container suficiente pa asina trata di recupera e costo for di mercado internacional.
Loke ta tristo ta e hecho cu apenas na luna di Maart, Gobierno di Brasil a anuncia cu dos planta Brasileño cu ta procesa Chicken Wings a wordo autoriza y haya permiso legal pa cuminza exporta Chicken Wings pa Canada. E luz berde a wordo duna pa Canadian Food Inspection Agency, despues cu auditornan a inspecciona tur proceso di e produccion di galiña. E compania BRF awor tin 15 unidad pa exporta galiña frozen pa Canada. Pero awor ta e problema di container a presenta.
E problema di Container a presenta su mes desde fin di aña pasa caba, ora cu a nota cu tin demasiado container pega na China, y tambe parcialmente na Waf di Los Angeles. E pandemia a causa interupcion di e velocidad cu ta manda container bashi y container yen bek pa nan destino.
Consecuencia di esey na comienzo ta cu hopi material pa construccion a bira scars, y eventualmente esnan riba mercado caba a cuminza subi di prijs. Aworaki prijs di biga, di plywood, y demas material pa construccion a subi di prijs na Merca, y tambe na islanan den Caribe. Y awor e situacion di container a bira mas serio, esta cu container refrigera tambe a bira scars. Lo bay dura un poco pa e logistica di move container lo bin bek na normalidad, y tambe cu plantanan lo cuminza procesa mes hopi bek atrobe. Pesey no grita e trahador di Supermarket si bo mira prijs halto pa Chicken Wings poni den freezer. Awor bo sa cu ta un dolor di cabez internacional e ta.
