Den weekend varios caso a presenta --- *Bida di hende ta keda un prioridad
ORANJESTAD (AAN): Parce cu e fin di siman aki tabata uno unda tabata tin varios actividad cu a tuma lugar, kisas algun di nan na mesun momento.
Pero locual a hala atencion tabata e hecho cu algun incidente a presenta cu a rekeri di inmediato e presencia di ambulans, pero ora cu e alerta a drenta, no tabata tin ambulans disponibel.
Por menciona cu diadomingo atardi, un di e incidentenan cu a presenta tabata na Baby Beach ora un turista a bira basta malo durante un evento di Soul Beach Festival, pero a resulta cu no tabata tin ambulans cu por a presenta pa duna prome auxilio na e persona aki cu a sak den otro.
Akinan, e promenan cu por a atende cu e turista femenino tabata algun di e agentenan di polis presenta na Baby Beach y a hiba e turista ImSan pa e por a haya atencion medico. Parce cu na ImSan tabata tin un ambulans, pero no tabata tin personal pa traha den dje.
Pareu cu esaki, practicamente na Nikki Beach un otro persona a bira malo y mesun situacion a presenta. No tabata tin ambulans.
E situacion cu ambulans no a caba eynan. Na aeropuerto, a bati alarma pa un turista abordo di un vuelo di jetBlue kende a haya ataca di curason.
E avion aki tabata preparando pa lanta vuelo, pero net un rato prome e turista a bira malo. Lamentablemente, e persona a fayece a pesar di por a haya toch atencion di e paramediconan na e sitio.
Asina por sigui menciona, ya cu mas incidente a presenta. Tin un accidente cu a sosode na Angoshi ora cu un dos auto a dal den otro, mientras cu por a mira e scarcedad di unidadnan di ambulans pa atende cu meldingnan ora cu diferente incidente sosode practicamente pareu.
Un isla turistico manera Aruba no por hunga cu bida di niun hende. Principalmente ora ta trata di actividadnan manera un festival di musica internacional of un evento deportivo masal ta tuma lugar.
Mester corda cu asina c'un incidente fatal sosode na Aruba, mesora e nomber di e isla ta bay den noticianan internacional. Esaki ta nifica cu no solamente e turistanan cu ta bishita Aruba mester por haya atencion den un caso unda nan bida ta den riesgo, pero e bida di e localnan tambe ta keda un prioridad.
Esaki ta un tema sigur cu mester bay sinta na mesa y atende cu ne mas lihe posibel.
