Santo blanco na Eagle Beach awor ta mas igual tur caminda

Marlon Croes di DOW --- ORANJESTAD (AAN): Diahuebs mainta, Departamento di Obranan Publico a convoca un conferencia di prensa, pa marca e final di Fase 1 di e proyecto di ‘Renobacion di nos Beachnan’.

   E mainta aki, Director di DOW, Marlon Croes a cuminza ta gradici tur hende, specialmente el a gradici e grupo di trabao, tambe Ministro Presidente pa e confianza y motivacion cu el a duna pa traha riba patrimonio cultural y historico cu tin na Aruba, y di por a aloca fondo pa nan por a traha cune.

   Croes a corda con na comienzo di e pandemia na Maart 2020, e grupo di ‘Aruba Amenities’ a keda institui cu e meta pa traha riba mantenimento y renoba patrimonionan nacional, natural, y historico, y esaki tin di forma parti di e strategia di Gobierno pa recuperacion economico di e pais.

   Director di DOW a subraya cu riba agenda tabatin diferente proyecto, y uno tabata pa revitaliza y renoba e beachnan, debi cu esaki ta e materia prima pa turismo.  Pero na 2020 no tabatin suficiente santo blanco, ni suficiente fondo aloca pa e proyecto aki.  Na 2021 si Ministro Presidente a aloca un suma, y asina DOW a cuminza ta colecta santo cu a bin for di e deposito di santo na Barcadera.

   Den 2021 a saca 18.000 m³ di santo blanco for di Barcadera, y a sigui cu e proceso pa sefta e santo pa haci’e limpi, despues prepar’e pa por drecha e beachnan di Aruba.

   Asina a cuminza cu e prome beach cu ta Arashi.  Aki a hiba 560 yarda di santo blanco.  Pero prome cu a pone santo blanco, a dicidi di cambia e infrastructura di drenahe di awa na Arashi.  Pa e simple motibo cu awa di e parkinglot ta core cu sushi y hiba esaki lama, y na su turno ta susha e beach y causa erosion di e santo blanco.  A pone tuberia y hiba e drenahe den e rooi mas panort, y despues a drecha e beach cu santo blanco fresco.

   E di dos beach cu a drecha aña pasa tabata Boca Catalina, unda a hiba 160 yarda di santo.

   Aña pasa a cuminza cu Eagle Beach cu ta un teritorio hopi mas grandi cu e otronan, y aki tin diferente trabao a wordo haci, y tin algun cu keto bay ta andando.  Pero aña pasa a cuminza cu e prome mitar y na 2022 ta cuminza cu e di dos mitar unda cu ta haci limpieza bao di e matanan, pa kita tur vegetacion bieu, etc.

   Pero durante e trabaonan a bin constata cu tin hopi piedra y material di construccion di pasado cu a keda eybao.  Awor a saca tur prome cu a pone santo blanco nobo riba dje y asina promove e isla.

   Awor por mira e santo blanco riba Eagle Beach for di lama te na e matanan, tin color blanco igual.  Pues e no ta mas ‘shinishi’ un banda y blanco na otro area.

   “Esey ta nos intencion, pa haci nos beachnan mustra mihor y forma parti di e producto Aruba,” Croes a bisa.