Santa Rosa Aruba a participa den conferencia “Farming the Future” na Hulanda

Minister Geoffrey Wever

ORANJESTAD (AAN):   Recientemente un delegacion di Departamento di Agricultura, Criadero y Pesca, Santa Rosa Aruba, lidera pa directora sra. Nathalie Maduro, a asisti e conferencia internacional “Farming the Future”, organisa pa farmingthefuture.nl na Hulanda.

            “Farming the Future” ta un plataforma internacional caminda profesionalnan di agricultura y produccion di alimento ta conecta, network y comparti conocemento riba futuro di agricultura. E evento ta enfoka riba temanan manera smart farming, practicanan sostenibel y innovacion den sector agri-food. Tur esaki ta alinea cu e vision y maneho di minister di Sector Primario, Geoffrey Wever y den cuadro di e Programa di Gobernacion AVP-Futuro, unda cu a acorda cu lo percura pa hisa produccion local di fruta cu berdura y stimula e produccion di fruta y berdura localmente uzando tecnologia cu ta compensa pa e limitacionnan di nos clima, obtenibilidad di tereno y suela.

            Durante e conferencia, e delegacion di Santa Rosa a topa cu diferente expertonan internacional y promotornan di agritech Hulandes pa analisa entre otro:

- Tecnologia pa smart farming, agricultura di precision y digitalisacion

- Strategianan pa agricultura inclusivo cu naturalesa y regenerativo

- Formanan pa reduci desecho di cuminda, mehora calidad di cuminda y fortalece sistema di produccion local di cuminda

            “Nos ta trahando duro riba implementación di agricultura moderno y innovativo na Aruba, usando tecnologia y innovacion den agricultura, pa asina nos haci Aruba menos dependiente di importación y duna oportunidad na nos localnan pa tin un negoshi den agricultura y e participación di Santa Rosa na e forum aki ta parti di nos strategia pa logra esaki”, segun Minister Geoffrey Wever.