Nathalie Maduro, directora di LVV-Santa Rosa:
ORANJESTAD (AAN) – Palabranan di pabien y elogio, e directora di Departamento di Agricultura, Cria y Pesca (LVV-Santa Rosa), Nathalie Maduro, a expresa pa Fundacion Savaneta, dirigi pa Norman Thijsen hunto cu su team, y tambe su comunidad, cu den corto tempo na establece, alcanzando logronan, mustrando cu un comunidad por trece cambionan positivo ora cu nan ta uni.
Bisando esaki, el a referi, den entrevista cu Matutino DIARIO, tambe na e pier di Brisas, na Savaneta. “Esaki ta un pier cu na 2012 nos a trah’e di nobo. E no ta un pier cu ta wordo uza necesariamente door di piscadornan of pa para boto. E ta un pier cu e comunidad di Savaneta ta uza hopi biaha unda famianan ta landa eynan; Diasabra mainta y tambe den siman tin un grupo di señoranan grandi cu ta landa eynan”, Nathalie Maduro a subraya.
El a señala cu ta importante pa tin piernan, no solamente pa stimula pa para boto of pa pesca, pero tambe pa siña e chikitonan pisca riba un pier, of pa tambe sigui cu e tradicionnan, principalmente Savaneta cu ta conoci como un distrito di piscado.
Pa e motibo ey mes nos a wordo acerca tambe door di Fundacion Savaneta pa wak con eigenlijk nos por drecha e pier. Nos a tuma nota cu e trapi a kibra, y aworaki nos ta bezig cu e mesun compania cu a traha e pier na 2012, pa nos por drech’e bek p’asina nan por haci bon uso di dje”, Nathalie Maduro, director di LVV-Santa Rosa, a duna di conoce.
