Rino Hermans, director CMO:
*Tin ley y DOW ta controla pa wordo cumpli
ORANJESTAD (AAN) – Director di Crisis Management Office (CMO), Rino Hermans, a elabora tambe, den entrevista cu DIARIO, tocante e peligro cu edificionan bandona y den mal estado por trece cu ne, durante e temporada di horcan, si acaso tin pasada di un tormenta tropical. E rafaganan di biento duro cu ta pasando na Aruba tambe ta peligroso pa e edificionan aki, y DOW tin cu controla cumplimento di ley.
El a splica cu control riba tur doño di edificio, cas of negoshi pa cumpli cu e medidanan di prevencion cu ta para den ley, ta DOW.
Rino Hermans a splica cu esaki ta cay bao e bouw-verordening cu DOW ta aplica, y ainda por wak cu de bes en cuando, DOW ta saca un comunicado pa avisa cu “si no ta cumpli nan ta bay bash’e abao”, y pueblo ta bira “onsportief” pero nan ta trata di cuida e pida di ser humano den e hogar of e negoshinan pa cumpli cu e ley. “E ley no t’ey por nada, e ley t’tey pa nos por garantiza continuidad di salba bida, scapa e infrastructura, y nos economia tambe.
Hermans a subraya cu CMO tin den su mapa e edificionan bandona y e riesgonan cu nan por causa, y nan ta tene cuenta durante cu nan ta haya alerta pa pasada di un sistema tropical, cu e lugar por ta un menaza pa e bisiñanan na banda, y si ta necesario ta evacua nan hiba nan na un lugar mas safe. “Esey lo wordo haci durante e proceso di preparacion pa e pasa di e sistema tropical. E ta keda un disputa entre e propiedad cu e ley y abo, pa ser un bon bisiña.
Hermans a bisa cu bo mes no ta na peliger pero e bisiñanan rond si, si e lugar ta den un estado di deterioro of bo no ta cumpli pa scapa bida di bo bisiñanan.
