Sandy Croes-Kock a gradua como Master di Derecho na Tilburg Universiteit

ORANJESTAD (AAN): Cu hopi orguyo, Sandy Croes-Kock a gradua cu su titulo di Master di Ley  (LL.M.) na Tilburg Universiteit,

un di e institutonan academico mas prestigioso na Hulanda. Durante su trayecto academico, el a demostra dedicacion, perseverancia y pasion pa e profesion legal.

Durante su estudio, Sandy a haya e oportunidad pa hasi un “stage” na Hof van Justitie na ’s-Hertogenbosch den afdeling Familie- en Jeugdrecht. E experiencia aki a dun'e e oportunidad  pa e mira di cerca con e sistema hudicial ta funciona den practica y asina yud’e desaroya mas su habilidadnan profesional den e mundo legal.

Sandy a gradua su master cu un specialisatie den Familie- en jeugdrecht.

Reflecionando riba e momento special aki, Sandy a expresa su gratitud profundo na tur personanan cu a apoy’e durante su trayecto academico. "Mi kier a gradici di curason na tur hende cu a apoya mi durante mi estudio. Prome cu tur cos danki na Dios cu durante ful mi estudio a guia mi. Na mi mayornan, mi casa, mi famia, amigonan, docentenan, supervisornan y coleganan: masha danki pa boso confiansa, conseho y motivacion. Sin boso sosten, e logro aki no lo tabata posibel."

E graduacion aki ta marca e cumisamento di un capitulo nobo den su bida. Cu su master den ley cu specialisacion den familie-en jeugdrecht, Sandy ta cla pa contribui na e desaroyo di derecho, husticia di proteccion di derechonan di mucha.

Cu e logro aki, Sandy kier inspira otro studiante nan pa sigui persigui nan meta, cu determinacion y dedicacion bo lo logra.