San Nicolas un biaha mas ta capital di Art Fair 2022

Parlamentario Alvin Molina (MEP):

ORANJESTAD (AAN): ArtisA y Departamento di Naturalesa y Medio Ambiente (DNM) a lansa Art Fair 2022 cu e aña aki ta hiba como tema ‘Climate Meets Fashion’. Meta di e proyecto ta pa conscientisa comunidad di e problematica di ‘Climate Change’ esta cambio di clima. Sigur esaki ta un topico di vital importancia cu mundialmente ta wordo trata, na unda cu Aruba tambe a compromete n’e agenda di Nacionnan Uni 2030.

  Art Fair tin como meta pa motiva comunidad pa actua awo y lo tuma luga di 4 pa 6 di november den cayanan di San Nicolas, cu ta conoci pa ta e ciudad di creatividad di Aruba, e ‘Art District’ di Caribe. Un weekend di arte, cultura y movemento. Artista, muralista y deseñadornan local y internacional di e.o. Argentina, Boneiro, Brazil, Curaçao y Taiwan lo ta presente pa forma parti di e gran proyecto aki. Loke ta bunita di e proyecto ta cu nos muchanan special por participa den e fashion show. Climate Meets Fashion, fashion with a cause, ta pa diberti, socialisa pero primordialmente crea conscientisacion pe cambio di clima.

   Manera director di DNM sr. Gisbert Boekhoudt a indica, arte cu fashion ta un bon manera pa promove conscientisacion pa protege nos naturalesa y medio ambiente. Ta di aplaudi iniciativanan asina y ta bunita pa wak con organisacionnan ta uni pa un causa comun. Mi ta invita comunidad di Aruba pa dia 4 pa 6 di november pa bishita e proyecto aki pa mira e pinturanan nobo riba e murayanan, disfruta di e gastronomia como tambe experiencia kico San Nicolas tin di ofrece na nos local como tambe nos bishitantenan. Mi ta curasha comunidad, si nos tur duna di nos banda maske ta cu un acto chikito, sigur hunto nos por contribui na un pais mas sostenibel, miho calidad di bida, cuida nos medio ambiente y nos ta perserva nos flora y fauna. Concluyendo mi ta desea e comision organisado hopi exito cu ehecucion di e proyecto aki.