San Nicolas Business Association hopi orguyoso cu Pizza Hut a habri

ORANJESTAD (AAN): Diahuebs atardi, den Bernhardstraat na altura di Wema, a habri e prome sucursal di Pizza Hut pa San Nicolas.

  E lugar di carryout y delivery aparentemente a bira un hit inmediato cu pueblo di San Nicolas.

   Y esey tabata algo cu a laga Directiva di SNBA, esta San Nicolas Business Association masha feliz mes.

   Andy Hernandez kende ta president di San Nicolas Business Association tabata presente na e apertura oficial, y a felicita gerentenan Glenn Croes y Tamara Lacle cu e inversion y bunita localidad aki pa asina cumpli cu e consumidornan di San Nicolas.

   El a bisa cu SNBA tambe ta di fiesta.  Ta un honor pa nan cu a tuma inversionistanan original di San Nicolas mes, pa traha y habri un sucursal di Pizza Hut na San Nicolas.  El a menciona un defunto mama di Glenn Croes tambe tabata president di SNBA.

   Hernandez a menciona tambe cu e atardi ey tabatin Don Pablo presente, kende tabatin Bata Shoes na San Nicolas presente.  Aki tur esnan presente a duna aplauso.

   Andy Hernandez a bisa cu nan ta bisa e comerciante di Pizza Hut, ‘Welcome Back Home”.

   Riba e potret aki por mira esnan di SNBA ta pose hunto cu gerentenan di Pizza Hut, y tambe Don Pablo cu antes tabatin Bata Shoes na San Nicolas.