Negoshi ta crece na momento cu mester a cera porta --- *Kico e resultado concreto di conflicto Ukraine lo bira? --- *Preguntanan serio ta bini dilanti den desaroyonan actual
ORANJESTAD(AAN)- Na 2021 mundo a reuni pa papia di clima. Storianan di horor a mira publicidad. Mester tuma paso contra cambio di clima cu mientrastanto tur hende mester a cuminsa sinti.
Pone un fin na petroleo tabata e mensahe cla cu a bini dilanti na publico y tur hende a cuminsa papia di auto electrico y formanan pa drenta un epoca nobo. Awe na 2022 tur cos ta petroleo. E Guera na Ukraine cu ta un horor humano, awe ta hala atencion pa tur e problemanan y formulanan di produccion di petroleo.
Cifranan y informacionnan cu ta alcansa nos di tur parti di mundo ta sorprendente. Petroleo di Rusia ta na discusion hunto cu tur e placa cu e pais cu a bisa cu como Comunista, e no stima placa, ta mira na peliger.
Tur caminda na mundo, exploracionnan ta tuma lugar cu mas urgencia cu nunca.
Den vecindario di Aruba, Guyana a dicidi di introduci su propio compania di petroleo y ta traha riba un futuro cu mester trece basta placa den caha.
Mientrastanto na Hulanda a cuminsa cu e epoca di hidrogeno y Gobierno Hulandes a yega na un cooperacion cu un compania pa asina traha riba e proyecto cu lo habri un ala nobo pa economia Hulandes den futuro.
Un rato mester para keto na loke realmente ta pasa na mundo. Con ta bay bandona petroleo? Kico e Guera di Ukraine lo nifica pa e salida di e epoca di petroleo?
Contractonan nobo ta wordo firma cada dia den un tempo cu mundo lo a cuminsa lubida petroleo pa dirigi su mes riba combustibel nobo.
Prijsnan di petroleo a keda riba 100 Dollar guia dor di e Guera na Rusia, cu na su turno ta basa tambe riba negoshi den petroleo.
Awor kico?
Biyones y biyones ta wordo menciona como posibel perdida of ganashi di mundo cu petroleo, cu tabata tema central di e Conferencia di Clima na 2021.
DIARIO ta en busca di mas y mas informacion pero no por scapa for di e impresion cu tras di e sufrimento grandi na Ukraine, e suspenso mundial grandi for di momento cu Rusia a invadi Ukraine, e palabra importante a keda, e entrada di Putin na petroleo cu ta haci Comunismo poderoso!
