Edward Maduro, Lider di SADA:
ORANJESTAD (AAN) – Lider di Sindicato di Aduana (SADA), den entrevista cu DIARIO a sigui splica cu ainda nan ta den spera si por haya un reunion cu Minister di Finanzas, pasobra e mester busca un solucion pa e asunto di huramentacion di un grupo di Douane Ambtenaar cu no por a tuma lugar na comienzo di siman.
Esaki, manera a wordo menciona caba, pa motibo cu Gobernador a manda instruccion pa e Director di Aduana no huramenta nan, debi cu e tin un pasado disciplinario.
Maduro a sigui bisa cu berdad ta bay tin eleccion na December, pero por ta cu e eleccion di gobierno por dura cortico pero por dura largo tambe, manera a pasa na Hulanda.
El a reitera cu mester busca un solucion pa su coleganan di Departamento di Aduana. Esey no ta kita cu SADA ta bay haci su esfuerzo pa haya un reunion cu e minister pa wak con pa yega na un solucion pa e problema menciona.
Edward a subraya cu semper, den pasado, e Minister tabata ehecuta e huramentacionnan. Aña pasa mes tabata tin un huramentacion na KPA, y e Minister mes a haci esaki.
Lider di SADA ta lamenta cu problemanan cu ta campando pa añanan ainda no tin solucion pa nan, y jammer pa bisa, segun Edward Maduro, pero SADA no ta haya e atencion cu mester y ta na su lugar.
