Randall Johnson:
ORANJESTAD (AAN): Un cantidad di delegado di e islanan di Caribe ta na Aruba pa e conferencia di Dutch Caribbean Agriculture Visioning Process y DIARIO a entrevista un di nan, esta Randall Johnson, kende ta hefe di Departamento di Agricultura di Saba.
El a splica cu e delegacion di Saba a bin Aruba pa traha hunto cu e otro islanan, compara ideanan y pa traha plannan pa e añanan cu ta bin, riba con por mehora agricultura riba tur e islanan.
Tambe el a splica cu e intencion ta pa mehora seguridad di cuminda y mehora e metodonan cu ta wordo uza den agricultura.
“Actualmente nos ta purbando di trece agricultura bek na bida na Saba y nos ta haci esaki door di motiva comunidad pa bira mas activo den planta den nan mesun cura”.
Nos ta brinda comunidad ayudo cu placa pa cumpra material pa planta, pero tambe nos ta stimula hende pa cria bestia, pa nos isla por tin carni fresco riba nos isla, segun Johnson.
El a splica cu gobierno ta yuda cu pago di locual ta necesario pa hende cria bestia.
E intencion ta tambe pa den futuro pone e muchanan di scol bira mas activo den agricultura, pa asina stimula nan pa nan ta activo den esaki ora cu nan bira adulto.
