SABA a celebra 50 aña y a bira Centro Medico pa Cuido Cronico

Raymond Kock: --- ORANJESTAD (AAN):   Diabierna ultimo na Villa Floralina, Stichting SABA a celebra su 50 aniversario y den cuadro di esaki a probecha pa presenta un logo nobo y nomber nobo cual awor ta bira Centro Medico pa Cuido Cronico (CMCC).

Director di CMCC, Raymond Kock, a duna di conoce cu mas y mas nan ta birando un instituto cu ta comparabel c'un hospital, pero na luga c'un persona ta drenta opera y sali, ora e persona drenta CMCC kiermen cu e tin un malesa cronico y e lo keda pa un tempo mas largo pa asina purba di tene e pashent mas saludabel posibel, a remarca.

El a agrega cu 50 aña pasa, hopi di e hendenan cu tabata drenta SABA tabata un grupo chikito. Ta trata di hendenan cu tabata traha na LAGO y ora cu nan a keda cla, nan a bin di otro islanan. Nan no tabata tin famia ni caminda di bay. E ora ey tabata tin mester di un lugar unda nan por a pasa nan dianan di behez na un manera trankilo y safe.

Den añanan 90 a cuminsa ripara cu ora cu tin hendenan cu malesa cronico no por a keda hospital y nan tabata haya falta di un lugar pa keda. Mas y mas e hendenan tabata haya indicacion pa bay SABA, a bisa.

Durante e decadanan, esnan cu tabata drenta SABA tabata bira e personanan cu malesanan cronico c'un duracion largo y no tabata tin ayudo ningun otro caminda. Despues esey a bin resulta cu na 2011, e prome doctor specialisa den geriatria a drenta SABA.

Awendia SABA tin 3 docter geriatra y den futuro sigur lo mester bin 2 pa 3 mas pa por maneha 200 hende cu tin aworaki. Pero si ta wak bon con ta bayendo e mester bira 5 pa por maneha e cantidad di pashent cu tin na CMCC, Raymond Kock a duna di conoce.