Analisis di ex-Parlamentario
- Mike de Meza mester ta reconoce e ‘zet’ di Eman
ORANJESTAD (AAN): E ex-Parlamentario Ryçond do Nascimento, a splica cu tempo cu AVP a cay na cero asiento na fin di añanan setenta, Henny Eman a bin back for di Hulanda y a logra crece e base leal di AVP na un grupo firme di mas o menos cinco mil votador sigur. E resto semper tabata swing voters. Mike Eman a hereda e base aki y a logra aumenta e grupo fanatico di AVP na mas o menos 10 mil votador.
E cifranan aki tabata worde proteha fervientemente for di e demas lidernan den AVP door di Henny hunto cu su amigo Koos. P’esey maske AVP a pasa door di varios escandalo di corupcion y tencion interno den e partido, e base fiel di Eman semper a keda firme. Esaki danki na cantidad di aña cu Mike tin den politica, e tipo di liderazgo cu e semper ta proyecta (djis wak e potretnan: manga lora brasando hende grandi, mucha y trahadornan).
Segun do Nascimento, segun hopi hende, un parti di su capital politico ta debi na e cantidad di fabor politico cu Henny y Mike a parti durante e añanan. Mike ta sin duda un lider cu experiencia. Su experiencia den gobierno nacional y contacto internacional ta pone cu su perfil ta fuerte y conoci.
Hende conoce Mike Eman tambe como un pensador strategico den marketing y den politica interno. E sa exacto con pa move den AVP, cu gran sentido pa e momento y e relacionnan di poder. Cu yudansa di amigonan den prensa, manera Leoncita Arends, Rene Zwart, Patrick Paskel y Speed, Mike semper a sa di controla su propio narativa, defende su mes, y pinta su contrincantenan preto.
Pero ojo: bao di e mascara di gran estadista, Mike Eman ta un gran manipulador, cu ta elimina su oponentenan interno y ta redistribui poder den su partido segun su propio plan. Ta p’esey Gerlien a prefera negocia su salida cu Mike enbes di sufri destruccion den man di un Eman.
Gerlien tabata sa bon bon con Mike Eman a traha pa elimina tur menaza pa e poder di Eman. Prome esey tabata Tico Croes, y despues tambe Otmar Oduber. Mike a elemina nan cu ayudo di su amigonan politico di confianza: Benny Sevinger, Arthur Dowers y Mike de Meza. Mike nunca a drenta den un confrontacion habri, sino a uza e tactica tipico di Machiavelli: aislamento, mina confianza, y traha riba nan reemplazo. E resultado? Un AVP caminda Mike a bira mas y mas central, na unda e ta presenta su mes como un salbador di Aruba, un amigo y un lider cu ta scucha e curason di pueblo, pero tras di e cortina di huma aki Mike a traha pa tin control completo.
E zet mas grandi tabata na vispera di e ultimo entregamento di lista na 2024. Maske AVP crece na 2009 y 2013 danki na e militancia continuo di Arthur Dowers, Mike de Meza y Benny Sevinger. Maske nan tabata su amigonan, pero toch, di un dia pa otro nan a bira un obstaculo pa Mike. Na momento cu e “hala bieu” aki di e partido a cuminsa bira un menaza pa Mike su liderazgo, Mike a cuminsa cu su plan nobo: Wendrick Cicilia.
Mike a play inocente, supuestamente uzando Wendrick como su chauffeur pa hib’e di entiero pa entiero. En realidad Wendrick tabata su inversion silencioso politico. Poco poco Mike a cuminsa promove Wendrick como su “yiu politico”, organiza evento na cas di partido y gaña cu ta Wendrick tabata e organizador, hiba Wendrick Hulanda y gaña cu Wendrick tabata e autor intelectual di e fondo di inversion cu Hulanda mester a yena y e 700,- Florin di aumento di pensioen. Asina Mike a asocia Wendrick cu e lider, mientras bo no por a mira ningun potret di Mike cu Benny hunto mas. Mike tabata hasta evita di bay bebe koffie cu “e hala bieu”. Na cierto momento Mike tabata cla pa lansa su candidato hoben como un lider nobo den e partido.
Ora cu e hala bieu a obliga Mike pone Wendrick riba number seis riba e lista, Mike a haci su move. E mainta di entrega di lista el a pone Monica Oplaat pone Mike como lijstduwer y Wendrick na su luga na number uno. Sin consulta, sin respet pa e partijraad y acuerdo interno. Un maniobra di poder, disfraza como renobacion di e partido.
E resultado? Wendrick a saca cinco mil voto. Mike mes tambe. Tur otro hunto? Shete mil. E mensahe tabata cla: sin Mike y sin su yiu politico AVP no tin bida. Asina Mike a kibra e old boys.
Pero esaki no a keda ey. Awo strategicamente Mike a pone Wendrick como minister, pero cu baby sitter: su handler Philippe La Reine. Naturalmente e yiu di Benny no. Mientras cu Mike Eman ta insinua cu ta MEP ta tras di e trancamento di e screening di De Meza, esunnan cu sa ta reconoce e man di Mike Eman den e zet aki tambe. Mike de Meza tambe a wak’e. Bo ta mir’e den su wowo cansa y tristo. Si Mike Eman haya su gana, Mike de Meza lo cay den e proceso di screening. Arthur Dowers lo keda completamente isola y Mike lo a bolbe consolida e poder den man di Eman. No pa merito, no pa transparencia, sino pa calculo, manipulacion y timing strategico.
Awe, cu mas y mas hende ta anhela transparencia, husticia y integridad, e movidanan aki mester pone nos pensa: Esaki ta e liderazgo cu ta sirbi e bon comun? Of e ta sirbi e interesnan politico partidario formando un sombra riba nos futuro? E panorama ta claro: e consolidacion di poder interno den AVP ta un hecho. E AVP-istanan cu a lanta Futuro pa Mike tambe a haya un bon deal. E pregunta ta keda kico nan kier haci cu e poder? E contesta ta den nan programa di gobernacion. Den e siguiente texto lo mi analiza a base di declaracionnan di e formadornan kico e programa aki ta revela, kico e ta tapa y na ki nivel nan kier obtene poder.
