ORANJESTAD (AAN): Na Oficina di UNOCA a tuma lugar un conferencia di prensa unda a anuncia algun detaye di e show
cu ta bay ta presentando den luna di December y ta trata akinan di 'Alegria di Ruthy 3- One Woman Show'.
Stanley Dabian como parti e elenco, a bisa cu nan ta trece un bunita mensahe y proyecto di un artista multifacetico, esta Sra. Ruthy Vrieswijk-Bergen, miho conoci como 'Lady Ruth'. E tin un trayectoria basta largo y e aña aki e ta cumpli su 50 aña den farandula.
Den forma di chansa el a dicidi di haci e One Woman Show di Lady Ruth #1, despues el e bira number 2 y awor ta bayendo pa e show number 2, Dabian a indica.
E show aki ya casi den ambiente di Pasco ta bay tuma lugar 14 di December proximo pa 8 pm den Cas di Cultura.
Ruthy Vrieswijk-Bergen a expresa cu e ta tribi pa na December proximo presenta su di tres show. El a laga sa cu el a cumpli 65 aña di edad na Juni ultimo y tambe e ta cumpliendo 45 aña di feliz bida matrimonial na December. Pesey e ta wak esaki como un celebracion tripel.
Ruthy a laga sa cu e show aki ta bay dedica na tres amiga y nan ta Gisela Croes, Melanny Thiel y Wendy Sneek den feliz memoria.
E biaha aki e tin artistanan invita, pero su musiconan a keda mescos, a indica.
El a gradici tur sponsor cu ta haci e show aki posibel.
Ray-anne Hernandez di UNOCA a bisa cu di nan parti ta hopi contento di por duna un man financieramente un biaha mas den un otro proyecto di un artista local, den e caso aki di Lady Ruth.
Tur fondo recauda durante e actividad aki lo bay pa Animal Shelter Aruba ya cu Ruthy ta di opinion cu e animalnan tambe ta importante.
