ORANJESTAD (AAN): Awe Diabierna lo tin apertura di Aña Academico 2022-23 na Universidad di Aruba.
Un di e studiantenan di Universidad ta Kiara Arends, kende alavez ta e actual Miss Universe Aruba 2022.
Den un entrevista, e ta studia na Facultad di Derecho, y a duna un splicacion riba e importancia di con Aruba mester di su ley di privacidad.
Na 2018 el a cuminza na Facultad di Derecho, y aña pasa el a obtene su Bachelor’s. Kiara semper tabata gusta ley, como cu e ta hay’e importante pasobra e ta mira bida “como un wega”, y ley ta e ‘reglanan’ cu mester sigui pa biba bon.
Awor e ta trahando riba su Master’s na Universidad, y e ta representante di klas pa Master’s tambe.
Kiara a escoge pa sigui e estudio di ley na Aruba mes. Pasobra pa bo bay traha bek na Aruba mes, ta importante pa bo conoce e leynan di Aruba. No tin mihor forma pa esey, cu djis studi’e na Aruba mes.
Ademas, Kiara a bisa cu ora cu el a haya chens na 2021 pa haci un ‘exchange’. Pues por a bay studia afo via di Universidad di Aruba mes, sin cu e mester a bay haci studielening y haci demas areglo pa tur esey.
Kiara semper ta consehando studiantenan hoben cu kier sigui e direccion di ley, y cu tin deseo pa un dia bira Abogado, Huez, of tambe den area huridico, y bo kier traha na Aruba, e ideal ta pa studia aki mes. Bo ta scapa hopi placa, keda na bo mesun isla, y bo ta yuda enriquece leynan di Aruba.
Su preparacion pa Miss Universe: Segun Kiara, el a termina caba tur vaknan di Master’s, y awor ta bayendo den e parti cu e tin di traha su tesis. E ta combinando e parti di tesis hunto cu e preparacion pa Miss Universe.
Segun Arends, e ta sinti cu e por a combine bon, como cu e area di ley a yude, principalmente e asunto di ley di privacidad, como cu e ta compronde mihor e contractnan cu ta wordo firma, demas preparacion, y e ta haya bon cu e ta wordo inclui den Universidad y e por demostra cu e tin su parti academico, pues no ta djis algo di beyeza sino tambe su preparacion academico.
E ley di privacidad ta bay eleva ley na Aruba, como cu actualmente e islanan di Caribe Hulandes ainda no ta na e nivel cu Hulanda si tin caba. Esey ta e importancia di e legislacion di privacidad cu ta bay pasa, cu ta bira un Consensus Rijkswet cual ta pone cu e leynan di diferente paisnan lo bay ta di acuerdo cu otro, y lo wordo eleva na e nivel cu ya Europa ta na dje awor caba.
