Rusette Croes a bira president nobo di SMAC

Carnaval ta cla pa start...

• Un biaha mas un dama na cabez di e organizacion 

ORANJESTAD (AAN): Diahuebs siman pasa, a tuma lugar eligimento di un Directiva nobo pa Stichting Maneho di Aruba su Carnaval (SMAC), y a socede bao di wowonan di Hunta di Supervision di SMAC.  E hunta ey ta consisti di president Julie Merencia (Dept. Cultura Aruba), Ivelisse Simon (ATA), Fred Steeghs (ATIA), Herrick Henriquez (Independiente), y Liesje Proveyer (Independiente).

   SMAC a haya un directiva nobo, consistiendo di Kiandra Geerman (Grupo Uni), Reginald Perez (Grupo Uni), Jahe Bikker (Gruponan Uni), Emily Geerman (Fund. Musica), Darlene v/d Biezen (Fund. Musica), Anchelino Vrolijk (Fund. Musica), Isai Labadie (Fund. Musica), Eugene Faro (Independiente), Sharine Croes-Dubero (Independiente), y Rusette Croes (Independiente).

   Miembronan di e directiva nobo di SMAC, posteriormente a eligi e “dagelijksbestuur” (directiva ehecutivo) di SMAC.

   Secretario di dagelijksbestuur a bira Xander Leon (Grupo Uni), Tesorero a bira Emily Geerman (Fund. Musica).

   Como president nobo di SMAC a keda eligi, Rusette Croes (Independiente).

   Julie Merencia di Raad van Toezicht a duna un pabien y exito na e grupo nobo, e board nobo di SMAC. Y ta desea nan tur sorto di exito, pasobra e sa cu e no ta facil.   Pero awor tin un dama Rusette Croes kende ya ta conoci den pasado activo den SMAC, pues a haci parti di e trabao den dos ultimo añanan cu e tabata directiva di SMAC.  Pues e sa di e tarea, y ta mira cu e lo bay haci un bon trabao.

   President nobo: Rusette Croes a hiba su palabranan oficial como President di SMAC, y el a indica cu p’e esaki ta un placer.  Realmente tabata su mes y cu e sosten di mi board cu el a wordo eligi como presidente di SMAC.

   “Manera cu nos tur sa, e no ta facil. E ta un dedicacion. E ta un trabao duro. E ta un trabao cu ta wordo haci a base voluntario. Anto esey ta haci’e un tiki mas cu reto. Pasobra bo ta kita tempo di bo famia pa bo entrega bo alma y cuerpo na carnaval. Pa bo pone un bon cos riba pia, un bon parada, un bon evento,” Rusette Croes a declara.

   Pues e kiermen cu facil e no lo ta, pero e tin Darren van Ommeren (president saliente) den board, y su mi directiva nobo, y e sa cu e lo bay ta duro.  Carnaval su periodo di 2027 lo ta hopi cortico!  Parada Grandi mes lo ta Diadomingo 7 di Februari.  Esey nifica cu ta bay start na November caba cu competencianan, e.o. Prins y Pancho.  Pero sa si cu ora cu bo pone un parada cu bo ta haya tur e elogionan su tras bisando cu bo a haci un bon papel, esey ta e satisfaccion di mas grandi cu lo bo por haya.

   “Na mi tesorero, mi secretaria y tambe mi vice-presidente cu ta eynan sinta, danki. Danki pa tuma e curashi hunto cu mi y na mi sobra di board-nan hopi, hopi danki y nos lo bay traha duro. Pasobra 11-11 a eynan mes y Carnaval ta hopi cortico. Kiermen danki un bes mas y danki pa boso tempo y boso dedicacion pa e amor pa Carnaval y pa Aruba,” Croes a declara.