ORANJESTAD (AAN): Diahuebs merdia a yega for di Asuncion, Paraguay , e atletanan di Bowling Kamilah y Abigail Dammers, kende a caba di finalisa nan participacion den 'Juegos Suramericanos ODESUR 2022'.
Kamilah y Abigail Dammers a conkista oro den dobel di bowling femenino na Asuncion. Kamilah mes a gana oro den single pa un total di 2 medaya di oro pa Aruba.
Den entrevista cu DIARIO, na nan yegada na aeropuerto, Kamilah a bisa cu pa e weganan aki nan a bin ta prepara for di aña pasa caba. Unabes cu nan a clasifica e preparacion a inicia. Nan a bay Merca dos biaha pa un siman largo pa asina dedica hopi ora na training.
E aña aki nan a competi na Merca, na Paraguay, Brazil. Tabata un aña largo di preparacion cu a caba ayera. "Nos ta satisfecho cu den tur dos categoria, individual y doble nan a logra e medaya di oro. Esey ta lo maximo", Kamilah a expresa.
E proximo reto pa e rumannan ta e Weganan Centroamericano cu lo tuma lugar na Juni 2023 y Weganan Panamericano na fin di October 2023. Pa otro aña esey lo bira e dos competencianan grandi y awo ta bin e parti di preparacion pa percura cu nan ta cla, a agrega.
"Bowling no ta un deporte grandi, dus ta keda na nos mes mi ta kere pa haci esey mas grandi cu ta posibel", Kamilah Dammers a finalisa bisando.
Nan a yega den compania di nan coach y tata, Chris Dammer y ricibi door di Minister di Deporte Endy Croes.
