Magaly Brito di SEPPA:
ORANJESTAD (AAN): Ainda oficialmente no a yega na un solucion riba e peticion di trahadornan di Post Aruba NV y cu a impulsa nan algun siman pasa pa tene walkout como protesta diferente dia.
Magaly Brito kende ta Secretario General di Sindicato SEPPA a indica cu enberdad nan tabata sperando di haya un solucion completo riba Diabierna siman pasa, pero esey no a cristaliza. El a indica si cu Ministro Arends a yama nan y pidi pa tiki pasenshi pa algun dia mas prome cu esey socede.
E siman aki a haya confirmacion di Ministro cu lo bay haya un contesta por escrito, y esey lo duna claridad na trahadornan riba loke gerencia di Post Aruba NV lo bay haci of no. Pero tin di corda cu e ta un punto di trabao cu ta regla den e Contract di CAO, y e ora ey di parti di gerencia e no a wordo ehecuta.
Pa debolbe e 105 Florin bek den salario, ta e exigencia di e trahadornan di Post Aruba NV. Pero na 2021 no a cumpli, y te ainda den 2022 no ta cumpliendo cu esaki.
“Nos ta pendiente pa mira eynan si nos ta bay yega na un solucion a corto plazo cu e Ministro encarga cu Post Aruba NV, of ta kico ta nan posicion, y e ora nos lo informa e trahadornan tambe di esaki,” Brito a declara durante un entrevista.
Sindicato ta nota cu Ministro den pasado caba a mustra interes den doorlichting di Post Aruba NV, pa asina haya sa cual ta e puntonan fuerte di e compania, y primordialmente haya sa cual ta e puntonan debil, cu por ta forma peligro pa existencia di e servicio postal na e isla. A base di esey a bin cu servicio y solucionnan cu ta yuda e compania estatal aki bay dilanti y genera suficiente pa e para riba su mesun pia.
E biaha aki, Post Aruba NV ta indica cu durante añanan nan a bin ta sufriendo perdida. Tambe ta hecho cu varios compania y instancia na Aruba cu ya no ta haci uso mas di servicio postal, y esaki tin efecto riba companianan cu e entrada no ta mescos cu antes.
Esaki ta pone cu compania mester por tin un vision pa dirigi bo servicio den otro direccion pa asina por keda genera entrada. Esey ta e intencion cu SEPPA ta spera cu a corto plazo Post Aruba NV tin un bon plan, pa asina e trahadornan y Sindicato por sostene den esaki, pa asina un empresa di pais Aruba por bay dilanti y hiba e servicio aki na un forma cu trahadornan tambe nan condicion di trabao ta wordo respeta y cumpli cune tambe.
Pero toch Sindicato y trahadornan a enfatiza cu e biaha aki e lucha ta pa haya e 105 Florin aki poni bek riba nan salario. Esey a pone cu Ministro y gerencia a bay pa asina sondea e posibilidadnan, y a base di esey contesta e trahadornan riba nan peticion, pa asina haya sa unda nan ta para.
Pues ainda trahadornan ta wardando riba e claridad ey, y Sindicato tambe ta wardando riba esaki. A base di e tan spera carta, e trahadornan por bay tuma decision ta kico lo ta siguiente paso.
