ORANJESTAD (AAN): Minister Dangui Oduber hunto cu Marc Figaroa di APA NV a reuni cu Royal Caribbean Cruiselines (RCCL).
Nan dos a forma parti di un delegacion di reino hulandes. E delegacion aki a consisti di Consul General di Hulanda na Merca sra. Emmerink, Secretaris Generaal di Buitenlandse Zaken, sr. Huijts y tambe directornan di DWH y sra. Eechoud cu ta directora di DWH.
Na e reunion a hiba tremendo combersacionnan caminda Royal Caribbean Cruiselines a duna pais Aruba credito pa e bunita resultadonan di turismo crucero y a informa na mes momento cu Aruba ta e di dos puerto den Caribe cu miho performance.
Nan a recorda con na aña 2021, Minister Oduber hunto cu sr. Figaroa, durante pleno pandemia a bishita e oficina di Royal Caribbean pa informa nan cu Aruba tin tur protocol cla pa asina habri e fronteranan maritimo.
E dia di e reunion ey no tabata tin ningun empleado na nan oficina principal. Tabata solamente e delegacion di Aruba y e team di RCCL. Despues di esaki Aruba a bira e prome pais riba nan itinerario na juni 2021 y awe RCCL ta hopi agradecido pa esaki.
Royal Caribbean a gradici Aruba pa e vision, e curashi y determinacion mustra. Pa aña 2022 Royal Caribbean a trece 240.000 turista crucero y pa aña 2023 ta proyecta pa trece 310.000 turista crucero. Esaki ta un aumento di casi 30% y ta demostra confianza den e maneho.
Minister Dangui Oduber ta gradici e Consul Generaal sra. Emmerink, e Secretaris Generaal sr. Huijts pa forma parti di e delegacion di Reino.
