Na 2014 Valero tabata candidato pa cumpra Citgo di Venezuela
- Aruba a negocia cu e dos companianan pa na mes momento
- Impacto economico di desaroyo petrolero catastrofico cu debe
ORANJESTAD (AAN)- “Den un mundo cu mester bandona petroleo pa e por scapa su medio ambiente, Gobierno Wever-Croes sigur a tuma e paso corecto pa dicidi cu ta pone un fin na e epoca di refineria petrolero na Aruba. Sinembargo, ta importante pa un rapport wordo traha pa conclui e impacto berdadero di e era riba Aruba.”
Esaki ta opinion di expertonan na momento cu Aruba ta alcansa un cruzada ecomico importante y ta despedi di petroleo como base pa reforma economico y introduccion di proyectonan di energia limpi.
“Un era economico ta cera,”un informante ta indica. Un era mundial den cual petroleo a dicidi pa bienestar financiero, economico y social na un gran cantidad di pais na su entrada.
Sinembargo, tabata petroleo tambe cu a percura pa problemanan serio ora el a cuminsa reduci su actividadnan. “Petro Dollar” ta un fenomeno cu lo drenta historia pa describi e impacto directo y indirecto cu e tabata tin na mundo. Paisnan manera Aruba awor mester cera e epoca di petroleo y entrega na historia informacion completo di e forma cu petroleo a drenta y kico el a haci cu economia cu a depende di e industria como pilar.
Pa Aruba salida di loke por considera e ultimo proyecto concreto di petroleo, a laga atras loke te awe Aruba no por supera, sigur si tene na cuenta cu e debe nacional di Aruba tabata e motibo cu Aruba tabata busca un formula magico pa produccion urgente di placa y e pais a uni den e aventura di Citgo cu Nicolas Maduro. “Ta evidente cu e atraccion di Citgo e tempo no a wordo bon studia,” informantenan ta indica.
For di momento cu Lago a cera su porta Aruba a dirigi su esfuerzonan riba reapertura di e refineria den un tempo cu industria petrolero mundial a cuminsa tambalea y a conoce crisis serio. Ta den e situacion aki mester mira e forma cu a atrae Citgo, durante practicamente mes temporada cu Valero a laga Aruba sin refineria pero a sigui uza e propiedadnan di Aruba.
Ora studia kico e dos companianan a haci den e temporada aki, por mira cu na 2015, Gobierno Venezolano a pone fin na su intentonan pa bende Citgo.
Riba e lista di companianan internacional cu kier a cumpra Citgo, ta aparece Valero cu no tabata interesa mas na sigui cu e refineria na Aruba na 2012 pasobra situacion internacional petrolero tabata malo. Valero a keda cu interes pa cumpra Citgo te na momento cu na inicio di 2015, Gobierno di Venezuela a dicidi cu ta scrap intento pa bende Citgo y cu ta bay soluciona Citgo a base di debenan cu lo a haci.
Ora Citgo mester a bini Aruba, Aruba mester a negocia cu Citgo pero tambe cu Valero, cu mester a entrega e refineria di Aruba pa Citgo, den cual Valero pues tabata interesa te Januari 2015. Valero cu a bolbe Aruba a base di areglo special cu el a haya ora tambe a baha BBO na mitar cu entrada di Gobierno Eman, a regla cuenta cu Aruba pa e despedi di e negoshi di terminal petrolero. Pues Valero y Citgo a topa den mes tempo den negociacionnan cu Gobierno di Aruba, cu tabata e tempo cu Valero tabata kier a cumpra Citgo. Informantenan ta cuestiona e hecho cu Gobierno di Mike Eman, no a haci un estudio mas profundo di Citgo, cu a bira e fracaso cu e herida economia di Aruba na forma funesto.
Aruba a wordo hiba na 2016 na un mundo di fantasia, cu a spart for di otro den cara di economico, situacion financiero y realidad social di Aruba na momento cu e debe nacional exigi medida fuerte pa cual e pagador di belasting mester a paga.
Na momento cu Quanten a bato na porta, informantenan di DIARIO a keda pendiente di loke lo pasa den e negociacionnan y a hala suspiro di alivio cu no a bolbe crea e impresion di un milager economico na Aruba.
“Na momento cu Aruba ta papia di reforma mester papia di cambio di maneho di Gobierno, cu mester ta cauteloso cu su plannan pa e pais,” informantenan ta indica.
Den e cuadro aki nan ta di opinion cu e rapport forensico riba e desaroyonan financiero di Refineria di Aruba, hunto cu mas estudio profundo di e decisionnan gubernamental cu a wordo tuma, bira un rapport cu ta entrega na futuro e prueba di loke fracaso di un proyecto, debi na falta di estudio necesario, por haci cu un pais, manera e situacion deplorabel di Aruba actualmente, ta sigui proba.
