ORANJESTAD (AAN): E siman aki, e alcalde di Rotterdam, esta Ahmed Aboutaleb ta pleitando pa autoridadnan cuminza controla delaster un container cu fruta cu yega for di Centro America y Sur America den e waf di Amsterdam.
E control mester ta dirigi riba droga.
Manera DIARIO a trece dilanti caba, recientemente e alcalde di Rotterdam, hunto cu Bart De Wever di Antwerpen, Belgica, a bishita Panama, Costa Rica y Colombia. Tur dos alcalde a bay enfatiza cu mester bin un mihor control pa cu importacion di droga via e wafnan di Rotterdam y Antwerpen.
Segun e alcalde Aboutaleb, transporte di fruta hopi biaha ta wordo usa como camuflahe pa sconde droga. Aworaki ta djis algun porciento di containernan di fruta ta wordo controla. Den su opinion, esaki mester cambia y bira un control di 100 porciento.
Nan ta pensa tambe, cu servicionan di autoridadnan Hulandes y di Belgica mester ta presente na e paisnan unda cocaina ta wordo cultiva y transporta.
Na aña 2021, e asina yama Hit and Run Cargo Team (HARC) cu ta un equipo di cooperacion di Douane, FIOD, Zeehavenpolitie y Ministerio Publico na Rotterdam, a logra confisca un total di 70.571 kilo di cocaina na e Waf di Rotterdam, y esaki tin un balor di 5 miyard Euro.
E cantidad di mas grandi cu nan a confisca aña pasa a ser haci na December, ora cu personal di Douane a haya 4.180 kilo di cocaina den un container cu bacoba procedente di Ecuador y tabata destina pa waf di Antwerpen.
Douane y polis algun dia pasa den un warehouse na Westland, a logra di confisca 2.100 kilo di cocaina. E droga aki tabata scondi den saconan grandi meymey di un cargamento di Mango procedente di Peru.
Riba e potret aki por mria e 4 mil pico di kilo di cocaina haya na December den un container di bacoba na Rotterdam.
