ORANJESTAD (AAN): Ariba 9 di november ultimo e logo nobo di 131 a ser revela door di Prinses Beatrix hunto cu un hoben di e Conseho Hubenil di 131
y Sophie-Belle Rafini cu a gana e competencia di pintura pa yega na e logo nobo di 131.
Den cuadro di celebracion di dia Internacional di Derecho di Mucha y 24 aña di existencia di 131, bandera cu e logo nobo di 131 a ser poni na 25 rotonde rond di Aruba. Di San Nicolas te cu Noord e banderanan di 131 ta visibel.
Un di e partnernan mas importante di 131 ta e mayornan. E mayor ta esun cu na momento cu e no por tey pa su yiu door cu e tin cu labora por ehempel, por dirigi su yiu pa tuma contacto cu 131. 131 ta aliado di e mayor den educacion di su yiunan. Pa medio di e banderanan ariba e rotondenan, e mayor ta ser informa tocante e logo nobo di 131. E banderanan lo waya ariba e rotondenan di 20 te cu 25 di november.
Pa por a adkiri e banderanan pa cada rotonde na Aruba, RBC Royal Bank (Aruba) a sostene 131 den esaki. RBC Royal Bank (Aruba) ta kere firmemente den derecho di nos muchanan y ta sostene iniciativanan cu ta salvaguardia esaki. Otro partnernan strategico cu a sostene e proyecto aki ta DOW, Watty Vos BLVD y Green Corridor Aruba.
Tambe kier a gradici nos otro partnernan cu ta tuma nan impacto social hopi serio y ta inverti den e muchanan y hobenan di Aruba y 131.
